15:52 12 августа 2019 г.
Пирĕн ентеш, çыравçă куçаруçă, Ева Лисина çуралнăранпа 80 çул çитрĕ. Ева Николаевна Именкасси ялĕнче çуралнă, Аслă Арапуç шкулĕнче вăтам пĕлÿ илнĕ. Каярах Мускаври К.Тимирязев ячĕллĕ ял хуçалăх академийĕнче вĕреннĕ. Ун хыççăн Мускаври М.Ломоносов патшалăх университечĕн Ботаника садĕнче, И.Сеченов ячĕллĕ медицина институтĕнче, М.Щепкин ячĕллĕ Театр училищинче ĕçленĕ.
Ева Лисина 1960 çулсен вĕçнелле çырма пуçланă. Вырăс тата ют çĕршыв çыравçисен пьесисене чăвашла куçарнă. Çыравçă пултарулăх анинче чи малтанах ачасем валли хайлавсем çырса палăрнă. «Çĕньял ачисем», «Хупах хăлха Илюк», «Тепĕр çул та килетпĕр», «Пăркка мучи калавĕсем», «Çăкăр чĕлли» тата ытти калав-повеçĕсенче ачасемпе чĕрчунсен туслăхĕпе, асамлă тĕнчипе паллаштарать.
Аслă Чемен ял библиотекине çÿрекен ачасем паллă çыравçа халалласа хатĕрленĕ кĕнеке куравĕпе паллашрĕç. Людмила Ежова библиотекарь Ева Лисина пурнăçĕпе пултарулăхĕ çинчен каласа пачĕ. Мĕнле майпа кÿлĕ вĕçме пултарни çинчен те пĕлес килчĕ ачасен. Çавна май çак хайлавпа пурте пĕрле паллашрĕç, ăса вĕрентекен калавсен сыпăкĕсене тишкерчĕç.
Муниципальное бюджетное учреждение культуры "Централизованная библиотечная система" Батыревского района Чувашской Республики