21:17 12 апреля 2016 г.
![«Ҫурхи кун ытамӗнче, савӑк кулӑ тӗнчинче» «Ҫурхи кун ытамӗнче, савӑк кулӑ тӗнчинче»](../UserFiles/news/201604/21/dsc00599.jpg)
Ака уйӑхӗн 7–мӗшӗнче – пӗтӗм тӗнчери сывлӑх кунӗ. Сывлӑха ҫирӗплетесси, упрасси пӗтӗмпех этем аллинче. Кун йӗркине пӑхӑнни, спортпа туслӑ пулни – ҫын кун-ҫулне чылай мала тӑсма пулӑшать. Кунпа пӗрлех ҫирӗп сывлӑх ырӑ кӑмӑл-туйӑмпа та тачӑ ҫыхӑннӑ. Тухтӑрсем ҫирӗплетнӗ тӑрӑх савӑк кулӑ, лайӑх кӑмӑл – чи сиплӗ, тӳлевсӗр эмел шутланать. Культура ӗҫченӗ шӑп та лӑп ҫак енчен пулӑшма пултарать те кашни куракана. «Ҫурхи кун ытамӗнче, савӑк кулӑ тӗнчинче» ятпа йӗркеленӗ концерта кӑшавӑшсемпе кӑрмӑшсем чӑтӑмсӑррӑн кӗтрӗҫ. Ĕнтӗ Маринесен шӳчӗсене курса тӑраничченех кулатпӑр-ха паян»,- пӗр-пӗрин хушшинче ҫапла калаҫнин ҫак кун урамра темиҫе те илтме май килчӗ. Мухтанас кӑмӑлпа мар, хамӑр вырӑнти артистсене курма тесен, Кӑшавӑшри культура ҫуртне халӑх кирек хӑҫан та лӑк-тулли пухӑнать. Ку хутӗнче те тем пысӑкӑш зал туххӑмрах кураканпа тулчӗ. Кунти культура ӗҫченӗсем кашни мероприятиех ҫӗнӗлӗх кӗртме тӑрӑшнине залра ларакансем асӑрхамасӑр тӑмаҫҫӗ: ҫӗнӗ сценкӑсене, ачасен тата аслисен шӳтлӗ юррисене тӑвӑллӑн алӑ ҫупса йышӑнчӗҫ курма килнисем. «Маринесем концерта васкаҫҫӗ», «Ботаник авланать», «Доярка», «Ҫул ҫинче», «Вокзалта», «Ват лашан япали», «Качака шырани» - ҫак шӳтсене курнӑ май залри ҫынсем куҫҫуль тухичченех кулчӗҫ. Концерт программинче «Калинушка» ача садӗнче тимлекенсем хутшӑнни те илем кӳчӗ. Сергей Порфирьевпа Александр Муллин юрланине вара куракансем килӗсене саланмасӑр та пӑхма хатӗр. Ертсе пыракансем залпа сывпуллашнӑ хыҫҫӑн та ҫак икӗ пултаруллӑ йӗкӗтӗн сцена ҫине тухса халӑх ыйтнӑ юрӑсемпе концерта малалла тӑсма тиврӗ.
Муниципальное бюджетное учреждение «Централизованная клубная система» Чебоксарского района Чувашской Республики