08:45 10 ноября 2015 г.
Кӗрхи ӑмӑр, пылчӑклӑ ҫанталӑка, тӗттӗм каҫсене пӑхмасӑрах ҫак кунсенче Ункӑпуҫӗнчи ял клубӗ лӑк-туллиех кураканпа тулчӗ. Кӑшавӑшри культура ҫурчӗ ҫумӗнчи «Шурӑмпуҫ» фольклор, «Алтӑр ҫӑлтӑр» эстрада ушкӑнӗсем тата «Кӑлтӑрмач» театр студийӗ кӳршисене савӑнтарма чи лайӑх юрӑсемпе тата шӳтсемпе килсе ҫитрӗҫ хӑнана. Кӑшавӑшсен репертуарӗ ялта пурӑнакана ҫывӑх: туслӑх, тӑванлӑх, ҫамрӑк ҫулсенчи ачаш та хӗрӳ туйӑмсем. Залра ларакансем чылай юрра артистсемпе пӗрле юрласа киленчӗҫ. Клубра ялта пурӑнакансен ҫак уйӑхра менельникӗсене паллӑ тунӑ ҫынсен списокне ҫырса ҫакни юрӑҫсене пысӑк пулӑшу кӳчӗ – юрӑ саламӗсем йӗркелеме май туса пачӗ. «Ятарласа вӗреннӗ артистсенчен пӗртте кая мар эсир», - мухтарӗҫ ункӑпуҫсем хӑйсен кӳршисене. А.Муллин ветеринарии тухтӑрӗ, С.Порфирьев юрист, А.Кириллова вӗрентекен, В.Федоров строитель, Н.Гавриловӑпа Г.Иванова пенсионерсем чӑнах та музыка тӗлӗшӗнчен вӗренсе пӗлу илнӗскерсем мар. Апла пулин те вӗсен уҫӑ сасси, кӗвӗри кашни ҫаврӑнӑша тӗрӗс пӗлсе илни, хӑйсене сцена ҫинче илемлӗ тытма пӗлни куракана тыткӑнлать. Концерт вӗҫленсен те ял ҫыннисем киле саланма васкамарӗҫ. Ҫавра сӗтел хушшинче ункӑпуҫсемпе кӑшавӑшсем тӗрлӗ юрӑ шӑрантарчӗҫ, пӗр-пӗрин ӗмӗчӗсемпе, ӗҫӗ-хӗлӗпе паллашрӗҫ. Ункӑпуҫӗнче те фольклор ушкӑнӗ йеркеленӗ. Унта 17 чиперкке ҫӳрет-мӗн. «Пирӗн сирӗнтен вӗренмелли пайтах»,- пӗтӗмлетрӗҫ тин кӑна йӗркеленнӗ ушкӑн пикисем. «Вӗренмелли пур пулсан хаваспах сире хамӑр патра кӗтетпӗр»,- шутлерӗҫ Кӑшавӑшри культура ҫуртӗнче ӗҫлекенсем. Ҫапла ӑшшӑн калаҫса уйрӑлчӗҫ районти икӗ пултарулӑх ушкӑнӗ.
Муниципальное бюджетное учреждение «Централизованная клубная система» Чебоксарского района Чувашской Республики