10:38 30 октября 2024 г.
Чăваш Республикин вĕренӳ министерстви «Килсе курăр хăнана, хапăл тăвăр йыхрава!» видеороликсен конкурсне кăçал тăваттăмӗш хут ирттерчĕ. Конкурс тĕллевĕ пĕтĕмĕшле пĕлӳ паракан организацийĕсенче вĕренекен ачасене тăван тавралăха юратма, тăван ен историне, культурине, чăваш чĕлхине лайăхрах пĕлме пулăшасси пулчĕ. Кунсăр пуçне министерство ачасем хăйсем мĕнле çĕр-шыв гражданинĕ пулнине ăнланса илме май паракан тĕп компетенцисене аталантарас тĕллев те лартрĕ.
Конкурса Чăваш Республикин вĕренӳ институчĕ йĕркелесе пычĕ.
Жюри пайташĕсене роликсенче ӳкерĕннĕ ачасем чăвашла таса калаçни, хавхалануллă каласа кăтартма пĕлни, паллă вырăнсене хăйсем кайса курса фото е видео ӳкерни, паллă çынсенчен чăн-чăн журналистсем пек интервью илме пултарни савăнтарчĕ.
Жюри видеороликсене пăхса тухса çӗнтерӳçӗсемпе призерсене палăртрӗ. Тăрмăш шкулӗнче 7-мӗш класра вӗренекенсем Петров Елисейпа Конова Карина (ертӳçи – Григорьева З.Н.) тата Тăвай шкулӗнче 8-мӗш класра вӗренекенсем Шартова Ангелинапа Сергеев Богдан (ертӳçисем - Степанова Г.А., Николаева И.Н.) çак конкурсра призерсен ятне илме тивӗç пулчӗç. Эпир çӗнтерӳçӗсене тата вӗсен ертӳçисене саламлатпăр, малашне те çитӗнӳсем тума сунатпăр.
Отдел образования администрации Янтиковского муниципального округа Чувашской Республики