00:00 16 июля 2007 г.
Утă уйăхĕнчи пысăк уява - Питрав кунне Анатри Тимеш ялĕнче анлăн паллă турĕç: çак кунсенче çуралнă çынсене саламласа, Питрав уявне асăнса пысăк концерт пулса иртрĕ. Уяв урам вĕçĕнче, Кĕçĕн Пăла хĕрринчи улăхра шавларĕ. Елчĕкри культура çуртĕнчен килнĕ артистсем хăйсен концертне - çак кунсенче 50 çул тултарнă Петр Кириллова халалларĕç. Иванпа Лилия Шурбинсем, Николай Краснов шăрантарнă çепĕç юрă-кĕвĕ пурин кăмăлне те кайрĕ, ял халăхĕ уявра ташласа савăнчĕ. Уява ирттерме пулăшакансем-Захаров Вячеславпа Кривова Светлана, клуб ĕçченĕсем, тĕрлĕрен шỹтсемпе вăйăсем, конкурсем йĕркелерĕç. Леонидпа Вячеслав Захаров Шупашкарти "Уяв" ансамблĕн юррисене шăрантарчĕç.