09:28 24 марта 2022 г.
Ҫитӗнекен ҫамрӑк ӑрӑва атте-анне чӗлхине юратма, хисеплеме хӑнӑхтарас тата пуплеве аталантарас тӗллевпе, Аслӑ Елчӗкри Г.Н.Волков ячӗллӗ пӗтӗмӗшле пӗлÿ паракан вӑтам шкулти чӑваш чӗлхипе литературине вӗрентекен Любовь Германовна Адюкова, «Пуканесен театрӗ» кружок йӗркеленӗ. Ҫак кружока 6-мӗш класс ачисем хапӑлласах ҫÿреҫҫӗ. Кунта вӗсем тӗрлӗ енлӗ аталанма пултараҫҫӗ-ҫке. Сӑнарсене калӑпланисӗр пуҫне пуканесен кӗпе-тумтрирне те хӑйсемех ҫӗлеме хӑнӑхаҫҫӗ, декорацие те вӗрентекенпе пӗрлех хатӗрлеҫҫӗ.
Хӑйсен ӑсталӑхӗпе паллаштарас тӗллевпе шкул ҫумӗнчи ача пахчине ҫÿрекен шӑпӑрлансене, ҫак кружока ҫÿрекенсем «Тилӗ, мулкач тата автан» юмах кӑтартса савӑнтарчӗҫ. Ҫамрӑк артистсен пултаруллӑхӗ ача пахчине ҫурекенсен кӑмӑлне кайни куҫкӗретех. Темччен хытӑ алӑ ҫупса савӑннинчех ҫакна асӑрхаса туйма пултарчӗҫ вӗсем. Мухтавлӑ ентешсен ҫулне халалланӑ проекта малалла тӑсса ҫитес кунсенче юмах кӑтартма ытти ача пахчисене тата шкулсене те ҫитме палӑртнӑ улттӑмӗшсем.
Большеяльчикский территориальный отдел Яльчикского муниципального округа
Первоисточник: МБОУ "Большеяльчикская СОШ им.Г.Н.Волкова" Яльчикского района