00:00 16 апреля 2009 г.
Ака уйǎхĕ Апакаси тǎрǎхĕн вулаканĕсемшĕн тĕрлĕ пулǎмсемпе тата паллǎ кунсемпе асра юлать. Анчах кǎна-ха вĕсем А.Г. Орлов-Шуçǎм композитор тата дирижер çуралнǎранпа 95 çул çитнине паллǎ турĕç. Çак кунсенче вара чаваш халǎх писателĕ Хветĕр Уяр çуралнǎранпа 95 çул çитет. Хветĕр Уяр ячĕ те Уйкас ялĕн ячĕпе тачǎ çыхǎннǎ. Мĕншĕн тесен, вǎл чǎваш халǎх артисткин Елена Васильевна Шорниковǎн мǎшǎрĕ пулнǎ май, çак яла килсе çÿренĕ.
Апакаси ял библиотекинче те темиçе хутчен пулнǎ. Библиотекǎна вǎл хǎй аллипе çырса кĕнекисен пуххине парнелесе хǎварнǎ. Библиотекǎра писателе халлаланǎ кĕнеке выставки йĕркеленĕ. Ку выставкǎра çыравçǎн 1965 çултанпа пичетленсе пыракан кашни произведенине вырнаçтарнǎ. Çавǎн пекех библиотекǎра хĕрĕсен, Тамарапа Луиза Федоровнǎсен аса илĕвĕсем те пур. Тамара Федоровна халĕ те ашшĕ-амǎшĕсен çул-йĕрне тусан пусма памасть. Уйкас ялĕнчи çуллахи çуртне пĕрмаях килсе çÿрет, Апакаси библиотекипе те çыхыну çирĕпленсех пырать.