14:29 02 декабря 2024 г.
Асанкасси ялӗнче пурӑнакан Николаева Раиса Ивановна паянхи кун 90 ҫулхи юбилейне паллӑ тӑвать.
Ачалӑхӗ ҫӑмӑл пулман унӑн. Тӑван ҫӗршывӗн Аслӑ вӑрҫи пуҫланнӑ вӑхӑтра 13 ҫулта пулнӑ вӑл. Ашшӗ вӑрҫӑра вилни пирки ача чухнех ӗҫе кӳленнӗ, амӑшӗпе пӗрле уй-хирте тӑрӑшнӑ: авӑн ҫапнӑ, кӗлте ҫӗкленӗ, ҫум ҫумланӑ, пахча-ҫимӗҫ шӑварнӑ…
Пӗве кӗрсен хӗр сысна пӑхнӑ ҫӗртре ӗҫлеме пуҫланӑ. Ӗҫре пысӑк ҫитӗнӳсем тунӑшӑн Раиса Ивановна ВДНХа медальне илме тивӗҫлӗ пулнӑ. Пурнӑҫ тӑршшӗпех колхозра тар тӑкнӑ вӑл.
Вӑрҫӑ вӗҫленсен, лӑпкӑ кунсем пуҫлансан хӗр хӑйӗн юратӑвне тӗл пулнӑ. 1957 ҫулта ялти каччӑпа Николаев Николай Семеновичпа пӗрлешсе ҫемье ҫавӑрнӑ. Кил-ҫурт ача сассипе тулсах пынӑ: тӑватӑ хӗрпе икӗ ывӑла кун ҫути парнеленӗ. Ачисене пурнӑҫ ҫулӗ ҫине тӗрӗс тӑратнӑ, пелӳ панӑ, мӗн пӗчӗкрен ӗҫе хӑнӑхтарнӑ вӗсене. Раиса Ивановна ултӑ ача ӳстерсе ҫитӗнтернӗшӗн "Ача амӑшӗ" медалӗсене ильме тивӗҫлӗ пулнӑ. Ачисене пӑхнӑ хушӑрах ӗҫе ҫӳреме те ӗлкернӗ, колхозра тӗрлӗ вырӑнта тӑрӑшнӑ хӗрарӑм. Чӑх-чӗп ферминче те вӑй хунӑ, пенсине ӳсен-тӑран рассади ӳстерекен парникре ӗҫленӗ вӑхӑтра тухнӑ. Ӗҫ ветеранӗ ятне ильме тивӗҫлӗ пулнӑ.
Халӗ Раиса аппа, чӑнах та телейлӗ хӗрарӑм. Унӑн икӗ ывӑлпа, тӑватӑ хӗр, 16 мӑнук тата 9 кӗҫӗн мӑнук.
Сумлӑ юбилей ячӗпе Раиса Ивановнӑна Асанкасси ял территори уйрӗмӗн начальникӗ Николай Карпов саламларӗ. Комсомольски округӗн пуҫлӑхӗ хатӗрленӗ салам ҫырӑвне тыттарчӗ, парне пачӗ. Халӑх вокал ансамблӗ "Ҫӑлкуҫ" саламласа хаваслӑ юрӑ-кӗвӗ парнелерӗ.
Раиса Ивановнӑна 90 ҫулхи сумлă юбилей ячĕпе чун-чĕререн чи ырă туйăмсемпе ăшшăн саламлатпăр. Юман пек ҫирĕп-сывлăх, чун канăҫлăхĕпе лăпкăлăх сунатпăр.
Асановский территориальный отдел Управления благоустройства и развития территорий администрации Комсомольского муниципального округа Чувашской Республики