19:44 14 октября 2022 г.
Ылтӑн тумлӑ кӗркунне
Сапать пĕр вĕçĕм кĕмĕлне.
Тавралăх çулçă эрешпе,
Йăлтăртатать сар шевлепе.
Ҫапла ылтӑн кӗркунне хӑйӗн илемӗпе илӗртет. Тавралӑх питӗ хитре, тӗрлӗ тӗспеле йӑлтӑртатса тӑрать. Калӑн Кӗр Пики ятарласа сӑррине шеллемен. Пур ҫӗре те ҫитме тӑрӑшнӑ тейӗн.
Ку илемлӗ тапхӑра нуммайӑшӗ кӑмӑллаҫҫӗ. Ҫакна шутпа илсе, кӗркуннене хисеплесе Пукрав кунӗнче Сителти культура ӗҫченӗсем "Ылтӑн кӗркунне - парнелерӗ илемне" ятпа уяв ирттерчӗҫ.
Мероприятине Ирина Лякова культорганизаторпа Оксана Хомуткина библиотекарь йӗркелерӗҫ. Вӑл питӗ интереслӗ пулчӗ. Кӗр кунӗсене юратакансем кунта самайӑн пуҫтарӑнчӗҫ. Вӗсем кӗрхи вӑйӑсемпе конкурссенче хаваспах хутшӑнчӗҫ. Ҫавӑн пекех илемлӗ юрӑсем шӑрантарса савӑнчӗҫ. Ҫулҫӑсен ташшине те чун каниччен ташласа киленчӗҫ. Кӗркуннене халалланӑ мероприяти пурне те килӗшрӗ.
Уявра Оксана Хомуткина библиотекӑна килнӗ ҫӗнӗ кӗнекесенчен хатӗрленӗ куравпа паллаштарчӗ. Чи кӑсӑклисем пирки кӗскен каласа кӑтартрӗ. Интереслисене илсе вулама та сӗнсе хӑварчӗ.
Первомайское сельское поселение Батыревского района