Лариса Ивановна интересуется историей и культурой родного края, и события прошлого отражаются в её стихах. В 2004 году к 60-летию Моргаушского района написала большое стихотворение — историю своего села.

Тойкилтĕ ялĕн кун-çулĕ.

Муркаш районĕ 60 çул

тултарнине халаллатăп.

1

Тахçан авал ку тăрăхра

Кашланă сĕм вăрман.

Хăрушă тĕттĕм чăтлăхра

Çынсен ури пусман.

Анчах пĕрре çак вăрманта

Туй халăх чарăнать.

«Туй килчĕ» тенинчен вара

Тойкилтĕ пуçланать.

Ĕçчен чăваш вăрман касса

Çĕнĕ çуртсем çĕклет,

Кăк кăкласа та çунтарса

Тыр-пул çитĕнтерет.

Часах шăп вăтăр ултă çурт

Йĕркипеле ларать.

(Пĕр ĕмĕр çур упраннă хут

Çакăн çинчен калать.)

Ĕçлет ял-йыш, шав тăрăшать,

Турра та кĕл тăвать.

Капмар чиркÿ тума йышпа

Укçа вăл пуçтарать.

Хусан Тур Амăш ячĕпе

Часах чансем çапаç,

Пупсем те хулăн сассипе

Кĕлĕсенче юрлаç.

Анчах та самани тĕк мар:

Çĕр-шыв йăлт улшăнать.

Тойкилтĕ шутламасть юлма,

Вăл çĕнĕлле сывлать.

«Безбожник» ятпала ялта

Колхоз чăмăртанать.

Çĕн шухăш-кăмăл тапнăран

Чиркÿ те хупăнать.

Çĕн самана тивлечĕпе

Медпункт туса лартаç,

Çĕр тĕрлĕ ыйтăвĕсемпе

Ял Советне утаç.

Хутла пĕлме ăнтăлнăран

Хресчен майне шырать.

Чиркÿ çуртне майлаштарсан

Ялта шкул уçăлать.

Çав вăхăтран Тойкилтĕре

Шкул пурăнать, ĕçлет.

Йĕс шăнкăрав ачасене

Кашни ирех чĕнет.

Тем чухлĕ ырă çын чунтан

Шкула халь тав тăвать.

Сергеев Леонид ăсчах

Кунта ĕçне пуçлать.

2

Çапах та ялăн кун-çулне

Халь малалла йĕрлер.

Тойкилтĕ паттăрĕсене

Пĕрле аса илер.

Аттелĕх вăрçине ялтан

Хĕрĕх т(ă)ват çын каять,

Анчах та вăтăр икĕ ар

Унтах выртса юлать.

Чун тухасла ял макăрать –

Пит йывăр-çке чăтма,

Çапах та тăрăшас пулать

Ура çине тăма.

Ватти-вĕтти тухать хире:

Акать, вырать, çапать.

Çĕр-шыв ыйтсан инçет çĕре

Вăрман касма каять.

Хуллен май пурнăç майлашать,

Колхоз та вăйланать.

Трактор-машинăллă пулсан

Хресчен пит савăнать.

Ильич лампочкине çутсан

Пÿрт ялтăрать кăна.

ÿксессĕн йĕп те курăнать –

Юмах пуль ку, чăнах.

Тем тĕрлĕ çĕнĕ хыпарсем

Родиопа çитеç,

Унтан ак телевизорсем

Шалтах тĕлĕнтереç.

Ĕçрен пушаннă самантра

Канма та савăнма

Ял хапхипе юнашарах

Клуб çĕкленсе ларать.

Унтах вулавăш вырнаçать,

Курма пулать кино.

Юрлас-ташлас килсен вара

Хăв ан ÿркен кăна.

Ял малаллах аталанать,

Лармасть алне усса.

Тыр пуссине комбайн тухать

Мăнаçлăн ярăнса.

Хресчен ĕçне çăмăллатма

Çĕн пăрăхсем хураç,

Çĕр тĕпĕнчен насоспала

Шыв уçласа тăраç.

Кÿршĕ ялпа пĕрлештерсе

Тăваççĕ пĕве пуç.

Унти шап-шурă хурăнсем

Куçа халь илĕртеç.

Çут пĕвинче шыва кĕрсе

Ял халăх савăнать.

Юнашарти чăрăшлăхра

Кăмпа татса пухать.

3

Яла йăлт çĕнĕ сăн çапать:

Ăçта пăхан – çĕн çурт.

Улăм тăрриллĕ урампа

Танлаштарма та çук.

Киввипеле юнашарах

ÿссе ларать çĕн шкул.

Спортзал, столовăй – пур йăлтах,

Хăв тăрăшуллă пул.

Ялти лавкка та çĕнелет

Хитре çурта куçсан.

Куллен кирлĕ тавар сĕнет

Сутуçă йăл кулса.

Пурнать Тойкилтĕ, тăрăшать

Кал-кал тума ĕçне.

Тăван районăн ÿсĕмне

Хăй тÿпине хывать.

Яла газ çитерес тесе

Чăнларăмăр хытах.

Президент Федоров хăех

Тивертрĕ факела.

Шкула çити шоссе те чалт,

Ĕç халăх хĕпĕртет.

–Çапах ял хушшипех асфальт

Пулсан аванччĕ, – тет.

Тойкилтĕ ялĕн çыннисем

Ырă ятне яман.

Аслă шкулсен алăкĕсем

Вĕсемшĕн хупăнман.

Кашни çулах ял уявлать

Казански праçникне.

Ваттисене сума сăвать,

Тытать йăлисене.

Ялта нумаййăн çамрăксем –

Малашлăх вĕсенче.

Янраччăр туслăх юррисем

Мĕнпур уявсенче.

Тойкилтĕ ялĕ – пĕчĕк ял,

Сăпайлă та хитре.

Кун-çулĕ кăсăк та пуян –

Каларăм йĕркипе.

Кăрлач уйăхĕ, 2004 çул.