10:11 02 мая 2014 г.
Йывăç-тĕм лартакансем, çутçанталăк тусĕсем, çуркуннепе кĕркунне хăйсен юратнă ĕçне пуçăнаççĕ. Вĕсем ăна чун ыйтнипе, çутçанталăка пулăшас, тавралăха илем кӳрес тесе пурнăçлаççĕ.
Оринин ял тăрăхне кĕрекен Чамăш ялĕнче пурăнакан пĕр урамри кÿршĕсем те Çуркуннепе Ĕç уявне лайăх кăмăлпа кĕтсе илчĕç. «Йывăç ларт тата ăна упра» акцие хутшăнса вĕсем пурте пĕр шухăшлă пулса ял хыçĕнчи улăхра йывăçсем лартса хăварма шутларĕç. Ку пуçарăва çак урамрах пурăнакан Оринин ял тăрăхĕн пуçлăхĕ А.С.Волков та ырларĕ, пĕрле ĕçлеме тухрĕ. Малтан кÿршĕсем вăрман хĕррипе шăтса тухнă çамрăк хунасем кăкласа килчĕç, унтан вара ял хыçĕнчи улăхалла çул тытрĕç. Çак ĕçре кашни хутшăнакана ятран асăнса хăварас килет: Р.В. Ремнева, И.М.Николаева, А.И.Белков, çавăн пекех Федотовсен, Волковсен, Курбановсен, Ершовсен çемьисем. Пĕтĕмпе 100 ытла хурăн, çăка, пилеш, чие çырли хунавĕсем лартса тухрĕç. Ĕç вĕçленнĕ май, тÿпене пĕлĕтсем хупласа илчĕс, çумăр çума пÿçларĕ. Ку, паллах, лайăх паллă, хунавсен малалла çеç ешерсе ÿсмелле. «Çакăн пек ырă ĕçсем малашне те тăвасчĕ, лартса хунă йывăçсене упраса хăварасчĕ», - теççĕ чамăшсем.
Территориальный отдел "Орининский" Управления по благоустройству и развитию территорий Моргаушского муниципального округа