13:12 14 марта 2016 г.
Çăварни уявĕ ĕлĕкренпех пырать. Çак вăхăтра хĕллепе çуркунне тĕл пулаççĕ, тавлашаççĕ, вăй виçеççĕ, урăхла каласан, кĕрĕкпе сăхман тĕл пулаççĕ. Çăварни тени, тепĕр майлă, «çу эрни», «хĕле ăсатни, çуркуннене кĕтни».
Çăварни эрнинчи кашни кунăн хăйĕн пĕлтерĕшĕ пур: тунтикун – тăвансем, тус-йышсем пĕр-пĕринпе тĕл пулнă, хĕвел питлĕ икерчĕпе чей ĕçнĕ; ытларикун – хуйхă-суйхă çинчен манса кайса вылянă, кулнă; юнкунпа кĕçнерникун кашни килтех тутлă апат – çимĕç пĕçерсе çинĕ, тăвансем пĕр-пĕрин патне хăнана çÿренĕ; эрнекун вара çамрăк мăшăрсен упăшкисем арăмĕсен амăшĕсене хăйсем патне хăнана чĕнсе икерчĕпе сăйланă, юрама тăрашнă; шăматкун хĕр-пултăрсем пĕрле пухăнса икерчĕ, кукăль пĕçерсе çинĕ, юрăсем юрланă; вырсарникун-кĕçĕн Çăварни, ялĕпех хĕле ăсатнă, ача-пăча катаччи чупнă.
Авалтан килекен йăлапа Хирпуç ялĕнче уяв иртрĕ. Ял тăрăхĕн пуçлăхĕ Терентьев В.Н., ял старости Харитонова Л.П., ĕç ветеранĕ Феофанова И.П. пуçтарăннă çынсене саламларĕç. Ҫуркуннене халалланă юрăсем янăрарĕç, ачасем илемлĕ сăвăсем каларĕç тата ташăсемпе савăнтарчĕç. Кӳршĕ Рункă тата Уравăш ялĕсенчен килнĕ хăнасем уяв юррисем шăрантарчĕç. Малалла ачасем тĕрлĕ вăйăсем вылярĕç. Вăйăсен шучĕ чылай: михĕпе сиксе ăмăртасси, автансен çапăçăвĕ, «лашалла» вăйă, канат туртасси, икерчĕ çиесси, шашка-шахмат тата ытти те. Кашни вăйă çĕнтерÿçисене вырăнтах тутлă пылак- çимĕç парса чысларĕç. Пурне те вĕри чейпе тата тутлă икерчĕпе сăйларĕç.
Улăмран туса хатĕрленĕ Çăварни карчăкне çунтарса усал-тĕселсене ялтан хăваларĕç. Чир-чĕр кайтăр! Сывлăха пултăр!
Ватти-вĕтти савăнать,
Пĕтĕм чиртен сывалать.
Юрлар, ташлар, йăл кулар,
Çуркуннене саламлар!
Хирпосинский территориальный отдел Вурнарского муниципального округа