10:32 17 июня 2015 г.
Çуллахи вăхăтра ахаль тата пылак шыв нумай ĕçнипе, чĕрĕ улма-çырла, санитари нормисене тивĕçтермен фастфудсем çинипе час-часах наркăмăшланма тата вар-хырăма инфекци ертме пулать.
Роспотребнадзорăн Чăваш Республикинчи управленийĕн мониторингĕ тăрăх, кăçалхи тăватă уйăхра республикăра пыршă инфекцийĕпе чирленĕ 3612 тĕслĕхе шута илнĕ.
– Наркăмăшлантаракан тата инфекци чирĕсем (сальмонеллез, дизентери, вирусла А гепатит) пуçаракан продуктсем шутне хăймапа е майонезпа хутăштарнă салатсем, кремлă кондитер изделийĕсем, шаурма, котлетсем, рулетсем, паштетсем, студень кĕреççĕ, – палăртать управленин эпидемиологи асăрхавĕн тата санитари хÿтĕлевĕн пайĕн тĕп специалисчĕ Наталья Гимранова. – Вар-хырăм улма-çырлана çумасăр, çĕрме пуçланине е хуппи айăпланнине çисен те пăсăлать.
Наркăмăшланас мар тесен апат продукчĕсене сутма ирек паман вырăнсенчен е палламан çынран илме юрамасть. Уйрăмах сĕт-хăймана, тăпăрчăна, килте консервланă продуктсене. Маркировка этикетки çук е упаковка пăсăлнă, срокран тухнă таварсем те хăрушлăх кăларса тăратаççĕ.
Паллах, апат çийиччен е хатĕрличчен алă çумаллине манмалла мар. Вар-хырăм пăсăлсан, температура хăпарсан тухтăр патне каймалла. Çак сĕнÿсене шута илни сывлăхăра упрама май парĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии