Проход по ссылкам навигацииЧăваш Республики  »  Хыпарсем  »  Паян РФ Президенчĕн федерацин Атăлçи округĕнчи полномочиллĕ представителĕ Михаил Бабич Шупашкарта ĕçлĕ çÿревпе пулчĕ
08.08.2017Паян РФ Президенчĕн федерацин Атăлçи округĕнчи полномочиллĕ представителĕ Михаил Бабич Шупашкарта ĕçлĕ çÿревпе пулчĕ
Паян РФ Президенчĕн федерацин Атăлçи округĕнчи полномочиллĕ представителĕ Михаил Бабич Шупашкарта ĕçлĕ çÿревпе пулчĕ. Вăл Совет Союзĕн Геройĕ А.В. Кочетов ячĕллĕ федерацин Атăлçи округĕн Чăваш кадет корпусĕнче пулса курчĕ. Мероприятие Чăваш Республикин Пуçлăхĕ Михаил Игнатьев, «Химпром» генеральнăй директорĕ Сергей Науман, РФ Çар-сывлăш Вăйĕсен Инçет тата Çар-транспорт авиацин пайĕн пуçлăхĕ Александр Цылев, ЧР вĕренÿ тата çамрăксен политикин министрĕ Юрий Исаев, çÿлерех асăннă кадет корпусĕн директорĕ Татьяна Казакова хутшăнчĕç.

Çавăн пекех Михаил Викторович Эгер бульварне, кадет корпусĕн çĕнĕ комплексне тăвакан вырăна çитсе курчĕ. Савăнăçлă лару-тăрура капсула хунă çĕре хутшăнчĕ, кадетсемпе, вĕсен ашшĕ-амăшĕпе тĕл пулса калаçрĕ, журналистсен ыйтăвĕсене хуравларĕ. «Ку федерацин Атăлçи округĕнчи 6-мĕш кадет шкулĕ пулать. Тепĕр вĕренÿ çулĕнче кунта çĕнĕ 400 вырăнлă вĕренÿ учрежденийĕ хута кайĕ. Çĕнĕ йышши çак пĕлÿ çуртĕнче вĕренекенсем кайран çар енĕпе хатĕрлекен аслă шкулсене, чи чаплă вĕренÿ учрежденийĕсене вĕренме кĕрĕç. Кадет корпусĕ çамрăксене сывлăш-космос енĕпе анлă пĕлÿ парĕ. Асăннă кадет корпусне Сызраньти сывлăш çар академийĕпе икĕ çар чаçĕ шефа илĕç. Кунта вĕренме республикăри ачасене кăна мар, ытти регионсенчен те 5-мĕш класран пуçласа илĕç. Кадет корпусĕн кивĕ çурчĕ те юлĕ, унта патриот воспитанийĕ паракан центр, е юнкăсен шкулĕ пулĕ. Çĕнĕ вĕренÿ заведенийĕ çамрăксене кадет енĕпе кăна аталантармĕ, спортри, пултарулăхри ăсталăхсене уçма, пĕр сăмахпа, пур енлĕн аталанма пулăшĕ. Пирĕн партнерсене, çĕнĕ шкул тăвас ыйтăва ырласа йышăннисене пурне те тав сăмахĕ калас килет. Мĕнех, ырă çул пултăр», - терĕ Михаил Бабич.

ЧР Пуçлăхĕ Михаил Игнатьев çак кунран Чăваш Ен, Шупашкар историйĕнче çĕнĕ страница уçăлассине, кадет корпусĕ çамрăксемшĕн юратнă вырăн пулассине шаннине пĕлтерчĕ. Малашлăхра кунта паркпа сквер та, футбол уйĕ те, пăр кермен те хута яма палăртнă.

Светлана НЕКРАСОВА, кадет шкулĕнче вĕренекенĕн амăшĕ:

- Пирĕн хулара çĕнĕ шкул, кадет корпусĕ хута яни пире питĕ савăнтарать. Ывăл ку шкула 2013 çулта пĕтерчĕ ĕнтĕ. Халĕ эпир унта хĕрĕмĕре Марийăна та ятăмăр. 11-те вăл. Çитес çул вăл çак çĕнĕ корпусра пĕлÿ илĕ. Лайăх ĕлкĕрсе пырать. Кадет корпусне хула варринче, çул хĕрринчен, чарăнуран инçе мар туни савăнтарать. Хĕрĕмĕре кунта килсе çÿреме чăрмавлă пулмĕ. Ку еннелле транспорт лайăх çÿрет.

Анжелика БЫКОВА, кадет шкулĕнче вĕренекенĕн аппăшĕ:

- Манăн шăллăм Егор Быков 5-мĕш класа куçрĕ. Анне ĕçре пулнăран ку мероприятие килеймерĕ паян. Эпир ку кадет корпусĕшĕн питĕ хĕпĕртетпĕр. Ку саманта тахçантанпах кĕтнĕ. Эпир 1-мĕш класранпах кадет шкулне лекме ĕмĕтленетпĕр. Кадетсем - çирĕп шухăш кăмăллă, анлă тавра курăмлă, ăслă, спорта юратакан çамрăксем. Манăн шăллăм та лайăх çын пулса ÿстĕр тетпĕр. Пурнăçра ĕмĕтленнĕ ĕмĕчĕсене пурăнçа кĕрттĕр. Пуласлăхĕ те унăн лайăх пултăр».

Петр ТЕПЛОВ, Тăван çĕршывăн Аслă вăрçин ветеранĕ, 94 çулта:

- Паянхи уява килсе курнишĕн питĕ савăнтăм. Ку кадет корпусĕ çав тери чаплă вĕренÿ учрежденийĕ пуласси куç кĕрет. Çакна хута яни историре çырăнса юлĕ. Кунта çамрăксем аталанĕç, çарпа спорт воспитанине илĕç, кайран Тăван çĕршыв хÿтĕлевçисен ретне тăрĕç. Вĕсем пирĕн шанăçа тÿрре кăларасса шанас килет.

Любовь ИВАНОВА, кадет шкулĕнче математика вĕрентекен:

— Асăннă шкулта ĕçлеме питĕ килĕшет, ачасене сĕре юрататăп. Ĕçлеме пуçланăранпа çулталăк кăна иртрĕ-ха. Кадетсем çав тери чĕрĕ ачасем. Вĕсемпе ĕçлесси савăнăç кăна. Пур çĕре те ĕлкĕреççĕ, темĕн те пĕлесшĕн çунаççĕ. Вĕсемпе пĕрле хам та аталанса пыратăп. Ашшĕ-амăшĕ те ăнланса, пулăшса пырать мана. Çитес çул çĕнĕ кадет корпусĕнче 5-11-мĕш классене математика вĕрентĕп.

Арина ЕГОРОВА, кадет шкулĕнче вĕренекен, 8-мĕш класа куçнă:

— Эпĕ Шупашкартанах, мана кунта вĕренме çав тери килĕшет. Кадетсен форми те илĕртрĕ мана, çар енĕпе пĕлÿ илес килчĕ. Хальлĕхе мĕнле аслă шкула каяссине палăртман-ха, анчах малашлăх çутă пуласса шанатăп. Пирĕн шкулта дисциплина питĕ çирĕп, кашни кун стройпа утатпăр, нормативсем паратпăр, физкультура урокĕсем ытларах пулаççĕ. Кадет корпусĕн çĕнĕ çуртне хăвăртрах туса пĕтерессе, хам унта пĕлÿ илессе шанатăп. Çĕнĕ çурт илемлĕ вырăнта пулĕ, çакă та савăнтарать.

("Хыпар" хаçатран)

Чăваш Республикин Пуçлăхĕн Администрацийĕ
428004 Шупашкар хули, Президент бульварĕ, 10-мĕш çурт
Факс (8352) 62-17-99
Сайтăн администраторне ыйтусем парас текенсем валли
Яндекс.Метрика