20 июня 2008 г.
Республика кунĕнче Шупашкарта, Йĕпреçре, районти ялсенче иртекен мероприятисенче пирĕн артистсем те хăйсен пултарулăхне кăтартĕç. Акă, çĕртме уйăхĕн 23-мĕшĕнче ачасен юрă пултарулăхĕн республикăри фестиваль-конкурсĕн лауреачĕ Катя Арапова, “Тайна” ансамбль (ача-пăча искусствăсен шкулĕнчен) Шупашкар хулинчи Хĕрлĕ лапамра “Чи хаваслă кун” тата “Ой, чăн та мар-и çав“ юрăсене шăрантарĕç.
Районти купăсçăсем тата “Тăвай Ен” ансамблĕ “Лакрей вăрманĕ” культурăпа канăвăн тĕп паркĕнче, “Мега Молл” суту-илÿ çурчĕ умĕнчи вырăнта уяв концерчĕсене хутшăнаççĕ. Çĕртме уйăхĕн 24-мĕшĕнче çак икĕ ансамбль Йĕпреç поселокĕнче 2 концерт парать.
Пирĕн артистсене республика тулашĕнче иртекен уявсене кайма та йыхрав килнĕ. Сăмахран, Тăвай районĕ Кемĕр облаçĕпе нумайранпа тачă çыхăну тытать. Кăçал Прокопьевск районĕнчи Михайловка ялĕ 100 çул тултарать. Пĕтĕм Кузбасри Чăваш культура центрĕ юбилее уявлама Тăвай район ертÿçисене, артистсене чĕнсе янă.
Источник: "Ял ĕçченĕ"