Район администрацийĕн культура тата информаципе тивĕçтерекен пайĕн ертÿçин Зарема Князеван пуçарăвĕпе нумаях пулмасть «Россияночка» ансамбль йĕркеленнĕ. Унта хутшăнма кăмăл тунисенчен ытларахăшĕ – район администрацийĕн хĕрĕсем.
…Иртнĕ ырă вăхăтсенче пĕр-пĕрин хавалĕпе районти ĕç коллективĕсен çумĕнче пултарулăх ушкăнĕсем йĕркеленни, çапла майпа çак çынсем хăйсен тĕп ĕç вырăнĕсенче тухăçлă вăй хунипе пĕр вăхăтрах тĕрлĕрен смотр-конкурссене хутшăнни, сцена çинче хăйсене чăн-чăн артистран кая мар кăтартма пултарнă çав вăхăтри сăнсем куç умне тухса тăраççĕ.
«Россияночка» ушкăнри пикесем – Татьяна Филимонова, Надежда Мешкова, Светлана Усанова /финанс тытăмĕ/, Марина Чернова /вĕренÿпе çамрăксен политикин пайĕ/, Ирина Никонова /экономика, пурлăх тата çĕр хутшăнăвĕсен пайĕ/, Марина Демьяновăпа Дарья Степанова /ЦКС/, Изабелла Мартынова /Елчĕк шкулĕ/ ытти чухне ĕçри, вĕренÿри хастарлăхпа палăрса тăнă пулсан халĕ, акă, сцена çине тухма çирĕп тĕв тытнă. Пултарулăх ертÿçи Зарема Князева вара «Россияночка» ушкăнăн малашнехи тĕллевĕ вырăс халăхĕн авалхи йăли-йĕркипе çыхăннă юрра-кĕвве чăваш халăхне ăса хывма пулăшассипе çыхăнтарать. Апла пулсан, малашлăхра ăнăçу пултăр!