29 мая 2018 г.
Ишпарайкка ялĕнче çуралса ÿснĕ, 1984 çулта Афганистан вăрçинче хăюлăхпа палăрса пуçне хунă Олег Прокопьев çамрăк сержант ячĕпе иртекен футбол турнирне ирттересси йăлана кĕчĕ. Иртнĕ кунсенче Шĕмшеш ял тăрăхĕн çĕрĕ çинче футбол турнирĕ пулнă. Çак мероприятие Олег Николаевичăн çывăх çыннисем тата пĕрле службăра тăнисем, Муркаш тата Элĕк районĕсен çар ĕç комиссариачĕн комиссарĕ Владимир Казаков, Шĕмшеш ял тăрăхĕн пуçлăхĕ Вячеслав Марков, «Афганистан ветеранĕсен Раççейри союзĕ» районти уйрăмĕн правленийĕн председателĕ Валерий Иванов хутшăннă. Турнира килнисем паттăр салтакăн вил тăпри çинче пулнă, футболла вылянă. Турнирта çĕнтерÿçĕ ятне «Туслăх» команда тивĕçнĕ. Николай Иванов чи лайăх вратарь пулнă. Афганецсен пĕрлĕхĕ ăмăртăва хутшăннисене салтак пăтти çитерессине те йĕркеленĕ.
Источник: "Пурнăç çулĕпе" Аликовская районная газета