29 июня 2018 г.
Çак кунсенче Первомайскинче авари пулнă. Сăлтавĕ - "Орион" текен юсавсăр велосипед. Руль умне ларнă çул çитмен ача икĕ кустăрмаллă "тимĕр ут" çула тухма шанчăксăр пулнине шута та илмен. Велосипедăн сăнчăрĕ лайăх ĕçлеменрен ача урампа анаталла вĕçтерсе пынă чухне чарăнса ĕлкĕреймен, малтан хирĕç килекен автотранспорт çулĕ çине тухса кайнă, ун хыççăн МТЗ тракторăн прицепĕ çине пырса кĕнĕ. Районти ГИБДД уйрăмĕн инспекторĕсем пĕлтернĕ тăрăх, ачана çийĕнчех Патăрьелĕнчи тĕп больницăна илсе çитернĕ.
Хальхи вăхăтра ялсенче ачасем çеç мар, аслă çулхисем те велосипедпа чылайăн çỹреççĕ. Çакна манса каймалла мар: кирек мĕнле транспортпа та çул-йĕр правилине пăхăнса çỹремелле, чăхăмлакан техникăпа çула тухмалла мар.
Источник: "Авангард" (газета Батыревского района)