03 апреля 2018 г.
Чăваш Сурăм ял тăрăхĕнче пурăнакан Тамара Владимирова çак кунсенче 90 çул тултарнă. Сумлă юбилей ячĕпе ăна район администрацийĕн вĕренÿ пайĕн начальникĕ Петр Павлов тата Чăваш Сурăм ял тăрăхĕн пуçлăхĕ Виктор Сорокин саламланă. Çавăн пекех Тамара Владимировна Раççей Президенчĕн саламлă çырăвне тата парнесене тивĕçнĕ.
Тамара Владимирова - тыл ветеранĕ. 1928 çулта çуралнăскер хаяр вăрçă çулĕсенче аслисемпе тан утă çулнă, тырă вырнă, вăрман каснă. Хисеплĕ юбиляр вăрçă хыççăн фермăра пăрусем пăхнă, конюхра та ĕçленĕ. Çапла майпа вăтăр çул ытла фермăра тăрăшнă. Мĕн ачаран çирĕплĕхпе чăтăмлăха тÿсме хăнăхнăскер паянхи кун та килте ахаль ларма пултараймасть. Икĕ мăнук тата пилĕк кĕçĕн мăнук ăна кулленхи пурнăçра хавхалантарса, савăнтарса пыраççĕ. Час-часах ăна пулăшма васкаççĕ.
Источник: "Пурнăç çулĕпе" Аликовская районная газета