Публикации » Чи лайăххисене палăртнă

23 марта 2018 г.

Çулсеренех районти вĕренÿ тытăмĕнчи чи лайăх вĕрентекене, класс ертÿçине тата шкул çулне çитменнисен учрежденийĕнчи воспитателе палăртас тĕлĕшпе конкурссем йĕркелеççĕ. Асăннă мероприятисем вĕрентекенсене хăйсен ăсталăхĕпе паллаштарма май панипе пĕрлех ĕçтешĕсенчен чылай çĕннине вĕренме пулăшаççĕ. Кăçал «Çулталăк вĕрентекенĕ» конкурсăн районти тапхăрне тĕрлĕ шкулти 8 вĕрентекен хутшăннă. Çак конкурсра И.Я.Яковлев ячĕллĕ Элĕкри вăтам шкулта кĕçĕн классене вĕрентекен Алена Валерьевна Ефимова чи пысăк балл пухнă. «Чи лайăх класс ертÿçи» конкурсра вара Чăваш Сурăмĕнчи вăтам шкулта физкультура урокĕсене вĕрентекен, кадет класĕн ертÿçи шутланакан Константин Витальевич Громова çитекенни пулман. Вăл 9 вĕрентекен хушшинче мала тухнă. «Çулталăк воспитателĕ» конкурса шкул çулне çитменнисен учрежденийĕсенче ĕçлекен 6 воспитатель хутшăнма кăмăл тунă. Элĕкри «Çăлкуç» ача сачĕн воспитателĕ Альбина Зайцева ачасемпе тата вĕсен ашшĕ-амăшĕпе хутшăнса ĕçлес ăсталăхĕ пысăк шайра пулнине çирĕплетсе панă.

Асăннă конкурссен районти тапхăрĕсенче мала тухнисем республикăра иртекен мероприятисене хутшăнаççĕ.