31 октября 2017 г.
Кĕрхи ĕçсенчен пушантăмăр ĕнтĕ. Каçсем те вăрăмланаса пыраççĕ. Кашнийĕнчех килте телевизор умĕнче ларасах килмест. Çакна шута илсе централизациленĕ клуб системинче ĕçлекенсем ялсене концертпа тухса çỹрессине мала хураççĕ. Ку хутĕнче вырăнти артистсем Алманчă, Пăлапуç Пашьел, Ишлĕ ял тăрăхĕсене çитрĕç. Пултарулăх ушкăнĕ куракансене савăк юрăсемпе, кулăшсемпе савăнтарчĕ. Д. Ванин, В. Арланова, Л. Корнилова, Р. Семенова, Ю. Езюков, А. Петрова пĕрер хутчен çеç те тухмарĕç сцена çине.
Упамса клубĕнче Чĕмпĕр облаçĕнчи Нагаткинăри "Укăлча" фольклор тата "Хĕвел" ачасен ансамблĕ пулчĕ. Вырăс, чăваш халăх юррисем чуна пырса тивмелле шăранчĕç унта. Кĕске сценкăсемпе шỹтсем, ташăсем концерт программине татах та пуянлатрĕç.
Источник: "Авангард" (газета Батыревского района)