23 июня 2017 г.
Район администрацийĕн вĕрентỹ пайĕн опекăпа попечительство секторĕн заведующийĕ И. Гурьева, çул çитмен çамрăксемпе тата вĕсен прависене хỹтĕлессипе ĕçлекен тĕп специалист Э. Петрова тата районти халăхăн ыйтăвĕсене тивĕçтерекен центрĕн специалисчĕ В. Григорьева Пикшик, Карай, Алманч, Упи ял тăрăхĕсенчи йывăр çемьесенче пулчĕç. Икĕ кун хушшинче вĕсем йĕркеллĕ маррисен пĕрлехи списокĕнче тăракан 13 çемьене çитрĕç. Рейдăн тĕп тĕллевĕ — ашшĕ-амăшĕ çул çитмен ачисене пăхассине мĕнле пурнăçласа пынине, вĕсене воспитани парассин условийĕсене тĕрĕслесси. Рейд вăхăтĕнче комисси членĕсем çемьесен пурнăçĕн пурлăхпа йăла условийĕсене тĕпчесе актсем çырчĕç, ашшĕ-амăшĕсемпе сывă пурнăç йĕркине пăхăнма, ашшĕ-амăшĕн тивĕçĕсене пурнăçласа пыма кирли тата çуллахи каникул кунĕсенче ачасен канăвне йĕркелесси çинчен асăрхаттару калаçăвĕсем ирттерчĕç.