08 июня 2017 г.
Çурхи ака ĕçĕсене вĕçлесен эпир йăлана кĕнĕ тăрăх Акатуя пуçтарăнатпăр. Кăçал Ĕçпе юрă тата спорт уявĕ шăматкун, июнĕн 10-мĕшĕнче, пулĕ. Çанталăка пула уява йĕркелỹ комитечĕ район центрĕнчи Çĕнтерỹ лапамĕнче ирттерме йышăннă. Акатуйăн савăнăçлă пайĕ 10 сехетре пуçланать. Ун вăхăтĕнче хĕрлĕчутайсене сумлă хăнасем саламлĕç, çурхи ака-суха ĕçĕсене пĕтĕмлетĕç, лайăх кăтартусемпе ĕçлесе пыракан ялхуçалăх ĕçченĕсене чыслĕç. Унтан районти чи лайăх пултарулăх ушкăнĕсем хăйсен юрри-ташшипе савăнтарĕç. Çавăн пекех спортпа туслисем валли тĕрлĕ ăмăртусем те иртĕç. Кун хыççăн 15 сехетчен дискотека пырĕ. 21-23 сехетсенче хĕрлĕчутайсемпе хăнасен кăмăлне концертпа дискотека çĕклĕç. "Акатуй мĕнле иртет, тыр-пул çапла çитĕнет", - теççĕ халăхра. Çавăнпа шăматкун пурне те пĕрле пухăнса савăнма йыхравлатпăр. Ĕçлеме кăна мар, канма та вăхăт тупмалла.
Источник: "Пирěн пурнăç"