05 мая 2017 г.
Çур аки тапхăрĕ малалла пырать. Районти ял хуçалăх предприятийĕсемпе хресчен-фермер хуçалăхĕсем тĕш тырă культурисене акассипе тата нумай çул ÿсекен курăксене сÿрелесе уй-хир анисене имçамлассипе тимлесе ĕçлеççĕ. Ака-суха ĕçне кĕске вăхăтра тата ăнăçлă вĕçлесси - аграрисен тĕп тĕллевĕ.
Майăн 4-мĕшĕ тĕлне районти хуçалăхсем çурхи тĕш тырă культурисене 1320 гектар çинче акнă. Ку енĕпе паянхи куна «Алмаз» тата «Колос» обществăсем, «Новый путь», Ульянов ячĕллĕ, «Авангард» хуçалăхсем, С.Волков, Ю.Никифоров, О.Петров, Г.Петриков, А.Григорьев ертсе пыракан тата ытти хресчен-фермер хуçалăхĕсем тимлесех ĕçлеççĕ.
Пĕр ĕçе пурнăçланă чух тепри те çав вăхăтрах тимлĕх ыйтать. «Иккĕмĕш çăкăра» лартмалли тапхăр та çывхарчĕ. Районти хуçалăхсем кăçал çĕр улмине 1136 гектар çинче лартса хăварма планланă. Хальлĕхе çĕр улми вăрлăхне 880 тонна суйласа хатĕрленĕ.
Анжелика СИЛИВЕСТРОВА.
Источник: "Пурнăç çулĕпе" Аликовская районная газета