Публикации » «Ылтăн туй» паллă турĕç

03 июня 2016 г.

50 çул пĕр-пĕринпе килĕштерсе пурăнасси арăмĕпе упăшкинчен килекен хăйне евĕрлĕ яваплăх темелле. Ку чухне çемьери лару-тăру арçынран е хĕрарăмран килнине пĕр сăмахпа палăртма май çук. Çак шухăшпа Урпашра пурăнакан Михайловсем те килĕшеççĕ. Герман Михайловичпа Нина Александровна иртнĕ кунсенче «ылтăн туйне» паллă турĕç. Çак мăшăршăн пĕр-пĕрин хушшинчи ăнланулăх, юрату паянхи кун та пĕлтерĕшлĕ. Михайловсен туслă çемйинче 7 ача кун çути курнă, ашшĕ-амăшĕ вĕсене кашнинех тивĕçлĕ воспитани парса пурнăç çулĕ çине кăларнă. Герман Михайлович мĕн тивĕçлĕ канăва тухичченех вырăнти культура тытăмĕнче чылай çул ĕçленĕ. Ашшĕне кура Роза хĕрĕ те çак çула суйланă-тăр. Хисеплĕ мăшăра «ылтăн туй» ячĕпе Питĕшкасси ял тăрăхĕн пуçлăхĕ А. Гаврилова тата культура çурчĕ çумĕнчи пултарулăх ушкăнĕ юрри-ташшипе саламланă.

Источник: "Пурнăç çулĕпе" Аликовская районная газета