30 апреля 2015 г.
Ерипен çĕр-шыв типсе пырать, çавна май субботник ирттерессине те ыранхи куна хăвармалла мар. Район центренче кăçал тавралăха тирпейлес ĕçе ытти çулхинчен маларах пуçăнчĕç, йывăç-тĕмсене касса хăтлăх кĕртрĕç, ытти ĕçе те васкавлăн пурнăçларĕç. Муркаш ял тăрăхĕн пуçлăхĕ С.Ермолаев каланă тăрăх субботник пуçланнăранпа çĕр автомашина тĕрлĕ тасамарлăх тиесе тухнă. Ку ĕç малалла пырать.
Субботник ирттересинче Муркаш шкулĕн, Муркаш ял тăрăхĕн, социаллă хÿтлĕх пайĕн, Муркашри культура çурчĕн, ФСК, Муркаш больницин коллективĕсем уйрăмах пуçаруллă пулчĕç, çавăн пекех нумай хватерлĕ çуртсенче пурăнакансем те активлă хутшăнчĕç.
Районти ытти ял урамĕнче те ĕçлеççĕ. Субботник ирттерме ĕлкĕрейменнисем те çук мар. Çак ĕçе вăраха хăвармасăр кашни çыннăн тавралăха тирпейлеме тухмалла. Хăрăк тата ытлашши туратсене касса пуçтармалла, тасамарлăха михĕсене пухса е ахальлĕн тиесе кăлармалла. Асăрханулăх пирки манмалла мар, вут-кăвар чĕртмелле мар. Çавăн пекех картишсене симĕслетес, чечек лартса илемлетес вăхăт та çитет. Тавралăх хăтлă пулсан пурăнма та кăмăллă.
Тĕп ĕç – Аслă Çĕнтерÿ 70 çул тултарнине тивĕçлĕ шайра кĕтсе илесси. Апла пулсан пĕр палăка тимлĕхсĕр хăвармалла мар, вĕсем таврашĕнче те тасатмалла, сăрламалла.
Источник: "Çĕнтерÿ ялавĕ"