17 декабря 2013 г.
Вăрман ĕçченĕсем çынсемпе тĕл пулса калаçусем ирттереççĕ, ăнлантару ĕçĕсем туса пыраççĕ. Чăрăшсене саккуна пăсса каснăшăн никама та пуçран шăлса каçармаççĕ – çирĕп ответ тыттараççĕ.
Чăрăшсене касма тата сутма Чăваш Республикин Çут çанталăк ресурсĕсен тата экологи министерстви ирттернĕ аукциона хутшăнса ирĕк илнĕ çынсем çеç пултараççĕ. Улатăр тата Шăмăршă вăрман хуçалăхсенче çакнашкал ирĕк А.Вавилов хăй тĕллĕн ĕçлекен предпринимателĕн пур.
Министерство çакăн çинчен аса илтерет: каснă е сиенленĕ пĕр чăрăшшăн çынсене 3–3,5 пин, должноçри çынсене 20–30 пин, юридици сăпатлă çынсене 50–100 пин тенкĕ таран штраф тÿлеттереççĕ, кÿнĕ тăкак хакне саплаштарттараççĕ. Йĕркене пăсакана, административлă майпа айăпланисĕр пуçне, уголовлă явап тыттарма та пултараççĕ. Кун пек чухне сиен 5 пин тенкĕрен ытларах пулнине шута илеççĕ.
Источник: "Шăмăршă хыпарĕ"