Публикации » Район администрацийĕн çĕнĕ пуçлăх

Кĕçнерни кун, раштав уйăхĕн 20-мĕшĕнче, район администрацийĕн залĕнче Тăвай енри депутатсен Пухăвĕн черетлĕ ларăвĕ пулнă.

Унăн ĕçне ЧР физкультурăпа спорт тата туризм министрне пулăшакан, Тăвай район администрацийĕн пуçлăхĕн должноçне йышăнмалли конкурса йĕркелекен комисси председателĕ Алексей Яковлев, ЧР Пуçлăхĕн Администрацийĕн ертÿçин пĕрремĕш çумĕ – шалти политика Управленийĕн начальникĕ Юрий Васильев, район администрацийĕн пуçлăхĕн тивĕçĕсене пурнăçлакан Владимир Ванерке, районти ял тăрăхĕсен пуçлăхĕсем, прокуратура представителĕсем, предприятисемпе организацисен ертÿçисем, районти депутатсен Пухăвĕн депутачĕсем хутшăннă.

Конкурс çĕнтерÿçи Владимир Алексеевич Ванерке пулнине пĕлтернĕ.

Ларăвăн кун йĕркинчи ыйтăвĕсене пăхса тухса депутатсем Тăвай район администрацийĕн пуçлăхĕн должноçне йышăнмалли конкурс комиссийĕн йышăнăвĕпе пĕр саслă пулса килĕшнĕ. Тăвай районĕнчи депутатсен Пухăвĕн пиллĕкмĕш сасăлаври депутатсен полномочийĕсен вăхăчĕ тухиччен район администрацийĕн пуçлăхĕ пулма В.Ванеркене уйăрса лартнă. Депутатсен Пухăвĕн председателĕпе Владислав Васильевпа район администрацийĕн çĕнĕ пуçлăхĕ Владимир Ванерке çакăн пирки килĕшÿ çырнă.