Публикации » Кинеми – 90 çулта

Пирĕн çĕр-шывра патшалăх аслă ăрури çынсене яланах хисеп тунă, сума сунă. Юлашки вăхăтра Аслă Отечественнăй вăрçăн 90 çул тултарнă тата аслăрах ветеранĕсемпе тыл ĕçченĕсене юбилей ячĕпе саламласа Президент Çырăвĕпе чысласси йăлана кĕчĕ. Ĕнер районти тата тепĕр ватă патне Президент саламĕ çитнĕ.

Тумликассинче пурăнакан Матрена Степановна Данилована 90 çул тултарнă ятпа Раççей Президенчĕ Владимир Путин саламланă çырăва хисеплĕ ватă патне район администрацийĕн ĕçĕсен управляющийĕ Анатолий Ейков çитернĕ. Кинемие сумлă юбилейпе саламланă май вăл вăрçă вăхăтĕнче ырми-канми ĕçленĕ çынсем чăннипех ырă сăмаха тивĕç пулнине палăртнă. Ку чăнах та çапла. Матрена Степановна "1941-1945 çулсенче Аслă Отечественнăй вăрçă вăхăтĕнче хастар ĕçленĕшĕн" медале те тивĕçнĕ. Вăрçă хыççăн та вăл тăван колхозра ĕçлесе тивĕçлĕ канăва тухнă.

Паян кинеми пĕчченех пурăнать. Унăн чун йăпатмăшĕ – ула кушакĕ. Куçĕсем япăхрах кураççĕ тата хăлхи витĕрех мар пулин те, Матрена Степановна район хаçачĕпе паллашма та хал çитерет. Каçсерен урама тухса кÿршисемпе тĕл пулса калаçма та вăхăт тупать.