Публикации » Хисеплĕ ята чăннипех тивĕçлĕ

Пирĕн районти шкулсенче тÿрĕ кăмăлпа, яваплăхпа палăрса тăракан учительсем чылай. Вĕсенчен пĕри – Хĕрлĕ Чутайри вăтам шкулта чăваш чĕлхипе литературине вĕрентекен Марина Васильева.

Марина Николаевна – пĕрремĕш категориллĕ учитель, вăл ачасене вĕрентес ĕçре 21 çул тăрăшать. Кашни кун уроксене васканисĕр пуçне вăл кăçалтан 5-мĕш классене хăй хÿттине илнĕ – тин кăна пуçламăш классенчен вĕренсе тухнисен класс ертÿçи пулма та çăмăл мар.

Марина Николаевна ачасен пурнăçне витĕр курса тăнăн туйăнать – кашниех çывăх уншăн, пуринпе те пĕр чĕлхе тупса туслашма тăрăшать. Кăмăллă вĕрентекен ачасене чăваш чĕлхин вăрттăнлăхĕсене уçса парать (тăван чĕлхе пулсан та, пĕлмелли, уçăмлатмалли пайтах-ха кунта!), чăваш писателĕсемпе поэчĕсен произведенийĕсене ăша хывма, тăван литературăна юратма пулăшать.

Ачасене тарăн пĕлÿпе тивĕçлĕ воспитани парас ĕçе чунĕпе парăннă вĕрентекен "Раççей Федерацийĕн пĕтĕмĕшле вĕрентĕвĕн хисеплĕ ĕçченĕ" ята чăннипех те тивĕçлĕ. Марина Васильевана педагогика ĕçĕнче малашнехи çитĕнÿсем тата учителĕн пархатарлă ĕçне пысăк хисепе хуракан вĕренекенсем сунатпăр.