Сирмапосинское сельское поселение Чебоксарского района Чувашской РеспубликиОФИЦИАЛЬНЫЙ САЙТ
Орфографическая ошибка в тексте

Послать сообщение об ошибке автору?
Ваш браузер останется на той же странице.

Комментарий для автора (необязательно):

Спасибо! Ваше сообщение будет направленно администратору сайта, для его дальнейшей проверки и при необходимости, внесения изменений в материалы сайта.

Публикации » Çамрăкра вăй, анчах тĕрев кирлех

03 февраля 2012 г.

Чăрăшкассинчи Куйбышев ячĕллĕ хуçалăхра Алексей Уривалов пиллĕкмĕш çул механизаторта вăй хурать. Ĕç­рен хăраман пултаруллă та маттур  25-ри çамрăка тахçанах асăрханă кунта. Кăçал вăл Чăваш Ен Президенчĕн стипендине тивĕç­нĕ. «Мĕн хушнине вăхăтра пурнăç­лать, чăркăшланса тăмасть. Ĕçе чунĕпе парăннă çын тесе калас килет ун пирки, «хурçă утне» те типтерлĕн пăхса тăрать», – терĕ хуçалăха ертсе пыракан Валерий Осипов калаçăва пуçарнă май. Алексейпе паллашас тĕллевпе хуçалăхăн выльăх-чĕрлĕх комплексне çул тытрăмăр. Хăйĕнпе хаçат ĕç­ченĕсем кăсăкланнине пĕлсен вăтаннă пек пулчĕ. «Президент стипендине тивĕçме пултарни савăнтарать, тата ытларах тăрăшса ĕç­леме хавхалантарать. Шанăçа тÿрре кăлармалла-ç­ке...» – терĕ каччă. Темĕнле йывăр пулсан та «йĕме» хăнăхманран-ши – пурнăçăн тÿнтер енĕсем çинче чарăнса тăрасшăн пулмарĕ вăл. «Пурте йĕркеллĕ, тивĕç­терет, малалла та çакăн пекех ĕç­лĕпĕр» – текен кĕске хуравсемпе çырлахма тăрăшрĕ. Ферма заведующийĕ Елена Андреева чăтса тăраймарĕ: «Мĕн калаç­малли ĕнтĕ, çамрăксене паян питĕ йывăр, ĕç укçи нимĕн тума та çитмест... Çавăнпах вĕсем хуçалăх ĕçĕсенчен писсе пыраç­çĕ, вăрăм укçа шыраса аяккалла каяç­çĕ», – терĕ. Куйбышев ячĕллĕ хуçалăхра лару-тăру ку енĕпе çивĕч. Кунта вăй хуракансем пурте тенĕ пекех аллă çула çывхараç­çĕ-мĕн. Çамрăк та иккĕн кăна: пĕри – асăннă стипендиат Алексей Уривалов механизатор, тепри – 22-ри Михаил Егоров сварщик. Алексейăн акă август уйăхĕнче йыш хушăнмалла. Çавăнпа та пухăнса пыракан стипенди укçи ăç­та каясси халех паллă. Çамрăк механизатор умĕнче тăракан тĕп тĕллевсенчен тепри – çывăх вăхăтра çурт лартасси. Хальлĕхе вĕсем мăшăрĕн килĕнче хÿтлĕх тупнă. Шел, тем пек тăрăшсан та хуçалăхра ĕç­ленипе çурт хăпартма йывăртарах...

Çăмăллăх илме çăмăл-и?

Мĕн ачаран çĕр ĕçĕпе пиçĕхсе ÿсни, «тимĕр ута» юратни яла юлма хистенĕ те çамрăка. Тăван хуçалăхра вăй хунине темĕнле сăваплă тивĕç пек йышăнать вăл, ашшĕн (Александр Алексеевич ĕмĕрĕпех асăннă хуçалăхра механизаторта вăй хунă) ĕç­не малалла тăсма пултарнăшăн мăнаç­ланать. Çавăнпах пулĕ укçа-тенкĕ çитмест тесе йăрмăшса ларма вăхăчĕ çук унăн... Çакăн пеккисем çинче тытăнса тăрать мар-и те паянхи чăваш ялĕ, хуçалăх предприятийĕ?

Патшалăх кÿрекен çăмăллăха тивĕç­ме пĕрре те ансат мар. Ялта пурăнакан çамрăк специалиста патшалăх çурт лартма пулăшать тенине кашниех илтнĕ паян, хаçатсенче те сахал мар çырнă кун пирки. Ку енĕпе Çырмапуç ял тăрăхĕнче лару-тăру еплерех пулнине пĕлес тесе вырăнти ертÿçĕпе Сергей Ванюшкинпа тĕл пултăмăр. «Ялăн социаллă аталанăвĕ» программа вăя кĕнĕренпе çурт лартма паракан субсидипе пурĕ сакăр çемье усă курнă. Çăмăллăх илес текенсем сахал мар, анчах та ăна тивĕç­мелли условисем ял çыннишĕн питĕ çирĕп: харпăр хăй вăйĕпе 70 процент таран çурт хăпартма пурте пултараймаç­çĕ. Субсиди илесси вара чи малтан шăпах çакăнтан килет, урăхла каласан – строительствăна вĕç­леме патшалăх 30 процент субсидилесе пулăшать. Шел те, кашни пусне шутлакан хресченĕн çурт кăшăлне хăпартма кĕсйи çÿхерех. Хут çинче кăтартнă шалăвĕ тивĕçтерсен кăна...

Сăмах май, çак çăмăллăха тивĕç­нĕ сакăр çемьерен пĕри те «АПК сферинче вăй хуракан çамрăк специалист» программăна лекеймен, субсидие вĕсем ялта пурăнакан пек илнĕ. Асăннă программа çăмăллăхпа 60 процент таранах усă курма май парать, анчах та кунта аслă пĕлÿ илни кирлĕ. Вĕреннĕ çамрăксем яла юласшăн маррине тепĕр хут çирĕплетмест-и çакă? «Мĕн калаç­малли ĕнтĕ, ял администрацийĕнче те специалистсем çитмеç­çĕ, 6-7 пиншĕн ăшă пÿлĕмре те ларасшăн мар халĕ çамрăксем, ял хуçалăхĕ пирки каламастăп та...» – терĕ  Сергей Алексеевич.

Источник: "Тăван ен"

Мой МирВКонтактеОдноклассники
Система управления контентом
д.Чиршкасы, ул.11-ой Пятилетки, д.1
Телефон: 8(83540) 2-11-82
Факс: (83540) 2-48-24
TopList Сводная статистика портала Яндекс.Метрика