Публикации » Йăрă хĕр упраç

Питĕркасси шкулĕнче вĕренекен Оля Михопаровара çамрăклăх çăл куç пек тапса тăрать тейĕн. Пĕр вырăнта нихăçан та тăпăртатса тăмасть вăл, вĕресе тăракан вăй-халĕ пур çĕре те çитерет. Кăçал вăл 10-мĕш класран вĕренсе тухрĕ. Шкул пурнăçĕнче активлă пулнă вăл, тĕрлĕ конкурссене хутшăннă. Республика шайĕнче иртекеннисенчен те аякра тăман. Сăмахран, иртнĕ çул творчествăлла пултарулăха аталантаракан "Созвездие" ятлă республика конкурсĕнче "Литературная" номинацире пĕрремĕш вырăна тухса Вĕрентÿ министерствин Дипломне çĕнсе илнĕ.

Авалтанах хĕр ачасем ал ĕçĕпе аппаланнă. Оля та çĕлеме юратать. Кăçал вăл ĕç урокĕнче хăйне валли пальто çĕленĕ иккен. Хăй аллипе ăсталанă тумтире хапăл тусах тăхăнса çÿренĕ. Лавккара туяниччен хăв çĕленĕ тумтир йÿнĕрех те ларать. Çакна аван ăнланать хĕр ача. Ахальтен мар вăл вăтам шкула вĕçлесен финанс енĕпе пĕлÿ илесшĕн.