Публикации » Нумай çĕннине пĕлчĕç

Кăçал пирĕн халăх Аслă Çĕнтерÿ пулнăранпа 65 çул тултарнине паллă тăвать. Çавна май пур çĕрте те çак уява тивĕçлипе кĕтсе илме хатĕрленеççĕ.

Шкулсенче те тĕрлĕ мероприятисем иртеççĕ. Акă, çак кунсенче Хырай Ĕнел вăтам шкулĕнче 6-мĕш класра вĕренекенсем районти «Çĕр тата çынсем» халăх музейĕнче пулчĕç. Аслă Отечественнăй вăрçăна халалланă выставкăпа паллашрĕç.

Музей заведующийĕ Ирина Петровна Ядрова залсене вырнаçтарнă стендсемпе тĕплĕн паллаштарчĕ.

«Пурте фронт валли! Пурте Çĕнтерÿшĕн!», «Эпир салтак ятне ямастпăр!» ятлă стендсем вăрçă çулĕсенчи вăхăт, çынсен пурнăçĕ пирки туллин каласа параççĕ. Афганистанпа Чечен вăрçинче пуç хунă салтаксене асăнса хатĕрленĕ стенд умĕнчен те хурланмасăр иртме çук.

Ачасем экскурсовод калаçăвне тимлĕ итлерĕç, ыйтусем те пачĕç. Халиччен илтменнине, вуламаннине нумай пĕлчĕç.

Вырăс чĕлхипе литература учителĕ Е.И.Лебедева музейра пулни, мĕн асра юлни çинчен урокра сочинени çыртарчĕ. Сочиненисенче ачасем вăрçă темине туллин хускатнă.