Çăмăл атлетика федерацийĕсен тĕнчери ассоциацийĕ "ИААФ" хăвăрт утассипе тĕнче Кубокĕсене 2016 тата 2018 çулсенче Шупашкарта ирттерме йышăннă.

Халиччен çавăн пек пысăк ăмăртусене ирттерме умлă-хыçлă пĕр хулана суйласа илни историре пулман. Шупашкарăн ку енĕпе опыт çук мар, 2008 çулта хăвăрт утассипе тĕнче Кубокĕ республикăн тĕп хулинче иртнĕ (2012 çулта – Саранскра). Чăваш Енре хăвăрт утасси анлă сарăлнипе те, хула илемĕпе, трасса лайăх пулнипе, “çăлтăрсем” пуррипе те çыхăннă ĕнтĕ ИААФ Шупашкара суйласа илни.