Тĕрĕслев пирки маларах пĕлтермелле
Районти прокуратура патшалăх тата муниципаллă тĕрĕслевсене пурнăçланă чухне уйрăм предпринимательсемпе юридици сăпачĕсен прависене епле хỹтĕленине тишкернĕ. Çакна палăртнă: Тралькасси ял тăрăхĕн администрацийĕ "Нива" ял хуçалăх производство кооперативне кăçалхи майăн 28-мĕшĕнче тĕрĕслевпе тухма пăхса хунă, кун пирки ял тăрăхĕн пуçлăхĕ май уйăхĕн 23-мĕшĕнчех йышăну кăларнă. Анчах та вăйра тăракан саккуна шута илмесĕр тĕрĕслев пуçланасси пирки майăн 28-мĕшĕнче кăна пĕлтернĕ. 294-мĕш федераллă саккунăн 9 статйин 12 пайĕпе килĕшỹллĕн планпа пăхса хунă тĕрĕслевсем çинчен юридици сăпачĕсемпе уйрăм предпринимательсене патшалăх (муниципаллă) асăрхав органĕсен тĕрĕслев пуçланиччен сахалтан та виçĕ кун маларах пĕлтермелле, кун пирки кăларнă йышăнăвăн е асăрхав органĕсен ертỹçин хушăвĕн копине почта урлă саккаслă çырупа ярса памалла. Уведомлени тăратмалли вăхăта пăхăнманни саккуна пăсни шутланать. Тĕрĕслев пĕтĕмлетĕвĕсемпе ял тăрăхĕн пуçлăхне представлени тăратнă.
В.ШОРКИН, район прокурорĕ.