Çулсерен хулапа районта снегоходсемпе квадроциклсен шучĕ ÿссех пырать. Февраль пуçламăшĕ тĕлне вĕсен шучĕ 14-та çитнĕ. Çак техника та трактор евĕрлех хăй патне пысăк тимлĕх ыйтать. Снегоходсен те (квадроциклсен, аэро çунасен...) Патшалăх технадзор органĕсенче çулсерен техтĕрĕслев тухмалла. Вĕсен рулĕ умне тракторист-машинист удостоверенийĕ çинче А1 категори пур пулсан çеç ларма юрать. Районта çакăн йышши техникăна регистрацилемесĕр çÿрекенсем те пур. Чылай чухне çакăн пек çулçÿревсем инкекпе вĕçленеççĕ. Инкеклĕ лару-тăру сиксе тухассине сирсе ярас, йĕркене пăсакансене тупса палăртас тĕллевпе Чăваш Енре нарăс уйăхĕн 1-мĕшĕнчен пуçласа 28-мĕшĕччен "Снегоход" профилактика операцийĕ иртет. Çак тĕллевлĕ операцие Чăваш Енри Патшалăх технадзор тата ГИБДД инспекторĕсем хутшăнĕç. Йĕркене пăсакансене тупса палăртса административлă йĕркепе явап тыттарĕç. А.ПЕТРОВ, Патшалăх технадзорăн районти аслă инспекторĕ.