03 декабря 2014 г.
Раççей Правительстви Чăваш Енре пурăнакан инвалидсем хăйсен сывлăхне Хура тинĕс хĕрринчи сывлăх учрежденийĕсенче сиплеччĕр тесе çĕр-шыв хыснинчен 13 миллион ытла тенкĕ уйăрса панă. Патшалăх канма каймалли путевкăна кăна мар, çул укçине те саплаштарать. Çак программăпа килĕшỹллĕн республикăри 329 çын Крымра сипленĕ. ЧР Сывлăх сыхлавĕпе социаллă политика министерстви унти чĕрепе юн тымарĕсен, сывлăш çулĕсен, вар-хырăм, нерв тытăмĕн тата шăмăсен чирĕсенчен сиплекен санаторисене суйланă. Район администрацийĕн социаллă хỹтлĕх пайĕн начальникĕ Вера Ярабаева пĕлтернĕ тăрăх, пирĕн районтан Крымри курортсенче канма икĕ çын килĕшнĕ. Пĕри _ Хĕрлĕ Чутай салинчи Алевтина Ивановна Куличева, тепри _ Тралькассинчи Николай Макарович Ижендеев, иккĕшĕ те виççĕмĕш ушкăн инваличĕсем. Паян-ыран вĕсем тăван тăрăха каялла çитме кирлĕ. Путевкăсене вара чылай инвалида сĕннĕ, анчах нумайăшĕ çулĕсене, чир-чĕрне пула вăрăм çула тухма шикленет-мĕн. Пĕтĕмпе вара социаллă хỹтлĕх пайĕнче сывлăх учрежденийĕсене сипленме кайма 55 çын черетре тăрать. А.ЗАМУТКИНА.