15 июня 2016 г.
Туçи Мăратри шкул ир-ирех ача-пăча сассипе тулнă. Сывлăха çирĕплетекен «Радуга» лагерьте кун каллех вĕрентÿллĕ, ăса хывăнмалла иртет.
Кăçал лагере кĕçĕн классенчи 23 ача çÿрет. Лия Угловапа Людмила Кустина воспитательсем вĕсемпе кунсеренех тĕрлĕ мероприятисем ирттереççĕ. Кĕçĕннисене уйрăмах профессисем çинчен калаçусем килĕшеççĕ. Ку енĕпе вĕсем хальтерех кăна кинофильм пăхнă.
Паллах, ачасемпе калаçусем ытларах профилактика тĕллевлĕ. Вут-çулăмран асăрханасси, çулсем, шывсем çинче харпăр-хăйне тытма пĕлмелли тата ытти пирки калаçаççĕ.
Ираида Малова физкультурник лагере çÿрекенсемпе куллен тĕрлĕ вăйăсем ирттерет. Ачасене хăйсене те уçă сывлăшра выляни ытларах килĕшет.
Лагерь ĕç-хĕлне ун пуçлăхĕ Эльвира Лукина йĕркелесе пырать.
Ку шкулта маларах палаткăллă лагерь те ĕçленĕ.
Районти ытти шкулсенче те лагерь пурнăçĕ кăсăклă. Аçăмçырминче акă вăл конструировани тата роботсем ăсталама вĕрентес тĕллевлĕ. Вăрнарти 2-мĕш шкулта ачасем сывлăш çĕленĕсене ăсталас механизмпа паллашнă тата ыт. те.
Пĕтĕмпе районĕпе шкулсем çумĕнче 22 лагерь ĕçлет. Вĕсенче 973 ача канать, сывлăха çирĕплетет. Кăçал ку тĕллевпе пĕтĕмĕшле 4097,68 пин тенкĕ уйăрнă. Вăл шутран 2300 пин тенки – хула тулашĕнчи лагерьсене путевкăсем туянма.
Светлана ЧИКМЯКОВА.
Пайăк ялĕнче пурăнакан Мария Никандровна Семенова хăйĕн ĕмĕрĕнче хура-шурне сахал мар курнă. Йывăрлăхсем çирĕплĕхе туптама пулăшнă. Вăл халĕ 90-ра. Апла пулин те чун ăшшине, ырă кăмăллăха çухатман. Ку ялта çуралса ÿснĕ. Çичĕ класс вĕреннипех çырлахма тивнĕ. ,çлемесĕр никам та çăкăр çитермест. Çавăнпа тăван колхоз уй-хирĕнче пиçĕхнĕ. Çамрăк пулин те аслисенчен юлман, бригадир мĕн хушнине чун ыйтнă пек пурнăçланă. «Ку ĕç çăмăл мар, килтен тухмастăп», – тесе нихăçан та каламан. Çапла, колхоз уй-хирĕнче куллен тар кăларнă, кану мĕнне те пĕлмен. Кунне-çĕрне пăхмасăр ĕçлесен те тулăх пурнăçпа пурăнман. Хĕр шутне кĕрсен ял каччине Николая качча тухнă. Унпа ултă ача пăхса çитĕнтернĕ. Шел пулин те вĕсенчен пĕри те халĕ юнашар çук, пурте çут тĕнчерен вăхăтсăр уйрăлса кайнă. Мăшăрне пытарни те темиçе çул. Паян пĕчченех Пайăкри Мария Семенова. Юрать-ха ăна мăнукĕсем пăрахмаççĕ, килсе çÿреççĕ. Кÿршисем те ăна сăнаса тăраççĕ, тунсăха кĕрсе ÿкме памаççĕ.
Мĕнех тăвăн, вăхăт малаллах шăвать, çавăнпа пĕрлех ĕмĕр иртсе пырать. Мария Никандровна çулсем кайнишĕн кулянмасть, ачисемпе мăшăрне çак пурнăçра тек курма май пулманнишĕн вара хуйхăрать. Иртнине, паллах, каялла тавăраймăн.
Юрий КОРНИЛОВ.
Источник: "Çĕнтерÿ çуле"