Иртнĕ канмалли кунсенче Элĕкри культура çуртĕнче республикăри 5-мĕш фестиваль-конкурсăн зонăри тапхăрĕ иртрĕ. Районти чи лайăх пултарулăх коллективĕсем хутшăнчĕç. «Чечеклен, илемлен, Чăваш Ен» фестиваль-конкурсра «Ветеран» халăх хорĕ, Чăваш Сурăмĕнчи тата Тавăтри культура çурчĕсен хорĕсем, Мăн Вылăри вокал ансамблĕ, Лилия Ефимова тата Светлана Соколова ертсе пыракан ушкăнсем «Ай, ташлар-и;» конкурсра палăрчĕç. Владислав Герасимов тата Николай Васильев «Атăл ывăлĕсен юрри-ташши» фестиваль-конкурса хутшăнчĕç. «Шăпăр-кĕсле, ай, янра!» фестивальте Ураскилтри халăх инструменчĕсен ансамблĕ, «Сăрпа Çавал çаврисем» фестиваль-конкурсра «Валинкке» фольклор ансамблĕн арçынсен коллективĕ тата Юлăшри, Кĕçĕн Тăванти, Çирĕккассинчи пултарулăх коллективĕсем тата «Валинкке» фольклор ушкăнĕ пултарулăхне кăтартрĕç. Чи маттуррисем Шупашкарта иртекен конкурсăн пĕтĕмлетĕвне хутшăнĕç.