Аслисен тивĕçĕ çул çитмен ачасене тĕрлĕ инкек-синкекрен, çутçанталăк сиенĕсенчен, пушартан, терроризмран асăрханма хăнăхтарасси пулса тăрать. Çавăнпа та çулсеренех районта «Полици тата ачасем» профилактика акцийĕ иртет.

Акцин пĕрремĕш тапхăрĕ 2017 çулхи февралĕн 27-мĕшĕнчен пуçласа мартăн 27-мĕшĕччен пырать. Çак тапхăрта участокри уполномоченнăйсемпе пĕрле çулсеренех шкулсенче право темипе калаçусем ирттеретпĕр, Раççей Федерацийĕн уголовлă тата административлă саккунĕсене пăхăнассине, çул-йĕр правилисене ăнлантарса паратпăр, сывă пурнăç йĕркине тытса пырассипе «çавра сĕтелсем» йĕркелетпĕр. Палăртнă графикпа шкулсене тухса çÿресе ачасемпе тата ашшĕ-амăшĕпе тĕл пулса калаçатпăр. Вĕренÿ учрежденийĕсенче тата обществăлла вырăнсенче хăйсене йĕркеллĕ тытмаллине, аслăрах çынсене хисеплемеллине тата пушă вăхăта усăллă ирттермеллине кашни ача патне çитерме тăрăшатпăр. Мĕнпур ĕçе район администрацийĕн çул çитменнисен комиссийĕн, опекăпа попечительство органĕн, вĕренÿ пайĕн специалисчĕсемпе пĕрле пурнăçлатпăр.

Пирĕн тĕп тĕллев - обществăра йĕркелĕхпе, ачасене хăрушсăрлăхпа тивĕçтересси. Шкулпа тата ашшĕ-амăшĕпе пĕрле тачă çыхăнса ĕçлени çитĕнсе пыракан ăрăва тĕрĕс çул суйлама май парать. Çапах та пурнăçри кирек епле лару-тăрура та ашшĕпе амăшĕн ачана тимлĕх уйăрмаллине манас марччĕ. Вĕсен малашлăхĕ пирĕнтен, аслисенчен, килет.

Марина НИКИТИНА,

çул çитменнисен инспекторĕ.