16 июля 2014 г.
Çак ỹкерчĕк çинчи Шкул урамĕ унччен Палтиелĕнчи чи çăрăлчăк та халăха пăшăрхантаракан урамччĕ. Уйрăмах йĕпе-сапаллă кĕркунне е çуркунне урампа çỹреме кансĕрччĕ. Шкул урамĕнче пурăнакансем патшалăх пулăшасса кĕтсе пурăнчĕç-пурăнчĕç те, иртнĕ çул хăйсен вăйĕпе çул тума пуçăнчĕç. Çĕр хăпартрĕç, вун-вун машина хăйăр турттарчĕç. Ял тăрăхĕн администрацийĕнчен пĕр пус укçа ыйтмасăр (ыйтсан та укçи çук!), хăйсен транспорчĕпе пысăк ĕç турĕç. Кăçал вара, ял халăхĕ тăрăшнине хисепе хурса, ял тăрăхĕн администрацийĕ Шкул урамĕ валли хăйĕн бюджетĕнче 350 пин тенкĕ тупма пултарчĕ. Çак укçа-тенкĕпе 280 метр тăрăшшĕ çул çине вак чул сарса тухрĕç. - Пыра-киле асфальт та пулĕ-ха! - теççĕ Шкул урамĕнче пурăнакансем. - Халĕ пирĕн çуртсен умĕсенче тирпей-илем тумалла, "Чи лайăх урам" ята çĕнсе илессишĕн тăрăшмалла.
С.АЛТЫНБАЕВ, ĕç ветеранĕ. Палтиел ялĕ
Источник: "Шăмăршă хыпарĕ"