02 июня 2012 г.
Июнь уйăхĕ - хĕр уйăхĕ, тенĕ авалтан: çĕрĕ кĕске те çутă, сад пахчисемпе çарансем çеçкеленеççĕ, кайăксем савăнса юрлаççĕ.
Июнь - хыт кукар, тыр-пул çитĕнтерет, çулталăклăх хатĕрлет, çиме памасть. Июньти ăшă - тиртен çĕлетнĕ кĕрĕкрен те ырăрах. Çуллахи вăхăт çумăрлă пулсан, хĕл юрлă тата сивĕ килет. Çĕрле тата ирхине лăпкă пулсан, çанталăк пăсăлмасть.
Çĕрле вăйлă сывлăм ÿксен, кăнтăрла хĕвеллĕ кун пулмалла. Иртенпех хĕвел шупкан, тĕтреллĕ курăнсан, каç еннелле çумăр кĕт. Ирхине шыв çумĕпе тĕтре сарăлсан та, кăнтăрла хĕвеллĕ кун пулмалла. Каç еннелле асамат кĕперĕ курăнсан, вăрăма кайнă сăлпăранлă çанталăк иртсе каймалла. Çумăр умĕн кашкăр çырли çеçкин шăрши вăйланать. Асамат кĕперĕн тĕсне асăрха: симĕсси ытларах пулсан - çумăра, сарă тĕс ытларах-тăк - уяра, хĕрли ытларах пулсан - çиллĕ, шăрăх çанталăка, кăвак тĕс нумайрах - çил те, çумăр та вăйланасса. Июнь çарансене çавапа хăратать. Ăвăс папакĕсем мăнтăркка пулсан, урпа ăнăçлă çитĕнмелле. Пилеш чечеке ларнă вăхăтра вăлтана çупах лайăх туртать.
Источник: "Урмарская районная газета"