15 августа 2014 г.
Красноармейски ялĕнчи Ленин урамĕнче пилĕк хутлă 59 хваттерлĕ çурт хута кайрĕ.
Ăна Шупашкарти “Доверие плюс” строителĕсем (генеральнăй директорĕ С. В. Егоров) çĕнĕ технологисемпе усă курса кĕске вăхăтра хута ячĕç, пурĕ 105 млн ытла тенкĕлĕх ĕç турĕç.
Сăмах май, ку çурта çĕкленĕ чухне строительство керамикин Красноармейскинчи “КЕТРА” завочĕ кăларакан паха йышши кирпĕчпе усă курчĕç. Хваттерсене кашни çемье уйрăммăн хутса ăшăтĕ. Картишĕнче ача-пăча лапамĕ тата автомашинăсене лартмалли ятарлă вырăн пур.
Çурта ĕçе кĕртнĕ чухнехи савăнăçлă митингра район администрацийĕн пуçлăхĕ А. В. Шестаков пĕрлешÿн техника директорне О. Ф. Кондратьева, А. В. Сергеев каменщикпе С. Л. Тимофеева штукатур-маляра Тав хучĕпе çырăвĕсем пачĕ.
Авариллĕ çуртри 10 тата нумай ачаллă 2 çемье те кунта хваттерсем илчĕç. Вĕсен ячĕпе Елена Антонова тав сăмахĕ каларĕ.
С. В. Егоров А. В. Шестакова символ çăраççи пачĕ.
Митингра çавăн пекех район пуçлăхĕ В. Н. Григорьев, “ТУС” ХАО техника директорĕ И. Воронов, Красноармейскинчи чиркÿ настоятелĕ Сергий атте пулчĕç.
Источник: "Ял пурнăçĕ" (Красноармейская районная газета)