05 мая 2009 г.
Кушкăри Вера
— Вера Константиновна, эп пĕлнĕ тăрăх, эсир тăван ял ытамĕнче пурăнсах ватăлтăр. Сирĕн кун-çул Кушкăпа çыхăннă вĕт?
— Тĕрĕсех. Эпĕ йышлă çемьере ÿснĕ. Чи кĕçĕнни пулнă. Кушкăри шкулта пĕлÿ пухнă. Кунтан çичĕ класс вĕренсе тухсан, кăмăл туртăмĕпех-ши, тăван кĕтесрен аякка каяс темерĕм. Ялах чун туртрĕ-çке.
— Ялти сĕт-çу фермине кăмăлланă ĕнтĕ. Хăвăр калашле, выльăх-чĕрлĕхпе йăпанма пĕлнĕ.
— Кил-çуртра та выльăх-чĕрлĕхсĕр пулман эпир. Ĕне усранă, сурăхсем те тытнă. Атте — Константин Яковлевич Яковлев, анне — Феодора Михайловна — ял-йышра хисеплĕ çынсемччĕ. Атте Тăван çĕр-шывăн Аслă вăрçин вут-çулăмĕ витĕр тухнă. Анне тăван хуçалăхра тĕрлĕрен ĕçсенче вăй хунă. Мана та мĕн ачаранпах выльăх-чĕрлĕхе юратма хăнăхтарнă вĕсем.
Чăнах та, ферма пурнăçĕ çăмăлах мар вăл. Кăвак çутлах вăранатăн та ирпе-ирех ферма алăкне уçса кĕретĕн. Кунта сана хăвăн “тусусем” — ĕнесем кĕтсе илеççĕ. Ун чухне мĕн пур ĕçе алă вăйĕпе пурнăçланă: тислĕкне хырса тасатнă, ĕнисене сунă, апатне лавпа турттарнă.
Шухăша путатăп та халĕ те тепĕр чух ферма пурнăçĕ, пĕрле, пĕр кăмăлпа вăй хунă тус-тантăшсем аса килеççĕ.
— Вера Константиновна, мăшăр çумра çук ĕнтĕ сирĕн. Çапах та Валерий мĕнпе асра юлчĕ?
— Ял каччи пулнă вăл. “Мичуринец” хуçалăхра водительте ĕçленĕ. Хут купăспа ăста вылянине манаймастăп. Иксĕмĕр пĕрле туйсене çÿреттĕмĕрччĕ. Мĕн чухлĕ халăха сиктермен пуль Валерий.
— Виçĕ ача пăхса ÿстертĕр мăшăрпа. Халь пурте çемьеллĕ ĕнтĕ. Ăçта вăй хураççĕ-ши?
— Чи асли — Эльвира — профессийĕпе вĕрентекен. Райцентрти пĕтĕмĕшле вăтам пĕлÿ паракан 2-мĕш шкулта тăрăшать. Çемьеллĕ. Саша ывăлăм — районти шалти ĕçсен пайĕнче ГИБДД уйрăмĕн инспекторĕ. Чи кĕçĕнни — Валя — райбольница медсестри.
— Вера Константиновна, сире, ырă кăмăллă хĕрарăма, манпа чуна уçса калаçнăшăн тавтапуç.
— Хăвăра та, тавах.
Г. Тусли
Источник: "Ял пурнăçĕ" (Красноармейская районная газета)