16:26 25 января 2021 г.
Тăван çĕршыва юратас, халăха паллă çынсене хисеплеме вĕрентес тĕллевпе, Николаева Татьяна Николаевна çуралнăранпа 140 çул çитнине халалласа Муркашри тӗп библиотекăра информаци сехетне «Чӑн-чӑн чӑваш хӗрарӑмӗ» ирттерчĕç. Мероприятие Муркаш шкул ачисене чĕнсе илнĕ.
Татьяна Николаевна Николаева-Алексеева 8 ывӑл - паттӑр амӑшӗ, 1-мӗш степеньлӗ Аслӑ Петӗр орденне тивӗҫнӗ. Татьяна Николаевнӑн ячӗ Чӑваш Республикин тата Муркаш районӗн Ӗҫ мухтавӗн тата паттӑрлӑхӗн хисеп кӗнекинче ҫырӑннӑ.
Татьяна Николаевна 1881 çулхи январĕн 25-мĕшĕнче Исетерккĕ ялĕнче хресчен çемьинче çуралнă. Ку куна эпир Татьяна кунĕ тетпĕр. Шăпи вара Çветтуй Татианăн пекех пулнă. Вăл савма та, юратма та пĕлнĕ.
1941 çул, июнĕн 22-мĕшĕ, вырсарни кун. Çĕршыв çине фашистла Германи тапăнса кĕрет. Татьяна Николаевнăпа Алексей Илларионович 8 ывăлне пĕрин хыççăн теприне Тăван çĕршывшăн çапăçма вăрçă хирне ăсатаççĕ.
Татьяна Николаевна патне çине-çине вăрçăран 4 ывăлĕн вилнине ĕнентерекен хучĕсем килсех тăчĕç. Чăтма çук йывӑр хуйхӑ пусать салтак амӑшӗн чӗрине. Салтак амӑшӗн чӗри хуйхӑ айӗнчен тухайман та урӑх. Вӑрҫӑ хыҫҫӑн 4 ывӑлӗ чӗрӗ юлнӑ: Александр, Родион, Фрол, Михаил.
Вӑрӑм ӗмӗр пурӑннӑ Татьяна Николаевна – 91 ҫул, вӑл 1971 ҫулта вилнӗ. Ҫав тери тирпейлӗ, йӑваш кӑмӑллӑ, ҫирӗп, хӑйне сăпайлă тытма пӗлекен чӑваш хӗрарӑмӗ пулнӑ вӑл.
Паттӑрсен амӑшне сума суса 1984 ҫулхи майӑн 9-мӗшӗнче Исетерккӗ ялӗнче палăк уҫнӑ.
«Татьяна Николаевна Николаевӑна – Тӑван ҫӗршыва хӳтӗленӗ сакӑр ывӑлĕн: Григорийĕн – Совет Союзӗн Геройӗн, Егорӑн – А. Матросов паттӑрлӑхне тепӗр хут кӑтартнӑскерӗн, Иванӑн, Павлӑн, Фролӑн, Родионӑн, Александрӑн тата Михаилӑн амӑшне», «Ача амӑш-героиньӑна асӑнса Чапаев ячӗпе хисепленекен колхоз ӗҫченӗсем. 1984» - ҫырнӑ палӑк ҫинче.
Вăрçă нушине тÿссе ирттернĕ Татьяна Николаевна чăтăмлăхĕ нихăçан та манăçа тухмĕ. Вăл хăйне шеллемесĕр уй-хирте вăй хунă, Çĕнтерĕве çывхартма пулăшнă. Çакăншăн Татьяна Николаевнăна çĕре çити пуç тайса тав тăватпăр.
Муниципальное бюджетное учреждение культуры «Централизованная библиотечная система» Моргаушского района Чувашской Республики