14:40 12 октября 2019 г.
Юрă чуна уçать, чĕрене лăплантарать. Ахальтен мар пирĕн асатте-асаннесем кашни ĕçе тытăнсассăн юрă шăрантарнă. Музыка енне туртăнас туйăм хальхи чăвашсенче те пур. Пур çеç мар, вăл çăл куç евĕр тапса тăрать. Çакна Пăлапуç–Пашьел культура çурчĕ çумĕнче йĕркеленнĕ пултарулăх ушкăнĕ Сител клубĕнче лартнă концертра курса тĕлĕнтĕмĕр.
Кунта кÿршĕ ялтан килнĕ «Пашьел» халăх фольклор ансамблĕ тата уйрăм юрăçсем хăйсен пултарулăхĕпе паллаштарчĕç. Зот Степанов купăсçăпа культура çурчĕн ертÿçи Елена Иванова ертсе пыракан ушкăн авалхи юрăсене çĕнĕрен чĕртсе тăратса куракансене хăйсен çепĕç те илĕртÿллĕ сассисемпе тыткăнларĕç. Вĕсем шăрантарнă вырăс, чăваш халăх тата эстрада хайлавĕсене сителсем питĕ кăмăлларĕç. Пурте пĕлекеннисене залрисем пĕрле юрласа чунĕсене лăплантарчĕç.
Пăлапуç-Пашьелсене ял халăхне савăнтарнăшăн, илĕртÿллĕ юррисемпе чунĕсене тыткăнланăшăн культорганизатор Ирина Лякова тав турĕ, вĕсен аталану çулĕ ÿснĕçем ÿссе пыма сунчĕ.
Первомайское сельское поселение Батыревского района