Новости » Геннадий Волковăн «Кил илемĕ» кĕнекине тишкерни

09:13 09 апреля 2019 г.

Оригинал

 Чăваш кĕнеке издательствинче тухнă этнопедагогикăна никĕсленĕ паллă педагогăн Геннадий Волковăн «Кил илемĕ» кĕнеки «Вулакан Чăваш ен: çулталăк кĕнеки - 2017» конкурс-фестивальте хутшăнать. Çавна май Хĕрлĕ Чутайри тĕп вулавăшра ĕçлекенсем Хĕрлĕ Чутайри вăтам шкулта 3 класра вĕренекен ачасемпе (вĕрентекенĕ – Галина Гусельщикова) краеведени сехечĕ ирттерчĕç. Вĕсем «Кил илемĕ» кĕнекери калавсемпе юмахсене вуласа тишкерчĕç. «Кил илемне» пысăках мар калавсемпе юмахсем кĕнĕ. Вĕсем урлă автор тăван халăхăмăрăн ăс-хакăлне, ăрусен çыхăнăвне, çемье хакне кăтартать. Пĕчĕккисене вăл аслисене, ашшĕ-амăшне, Тăван çĕршыва хисеплеме вĕрентет. Кĕнекене кĕнĕ хайлавсенче асра юлакан сюжетсем, ваттисен сăмахĕсем, ăнланмалла чĕлхе. Елена Чубайкина библиотекарь ачасене кĕнеке авторĕпе те паллаштарчĕ. Геннадий Никандрович Волков — педагогика ăслăлăхĕсен тухтăрĕ, профессор (1968), СССР тата Раççей шайĕнчи академик; çыравçă. 1927 çулхи юпан 31-мĕшĕнче Елчĕк районĕнчи Аслă Елчĕкре çуралнă. 2010 çулхи раштавăн 27-мĕшĕнче çут тĕнчерен уйрăлса кайнă. Хĕрлĕ Чутай районĕнче ун ячĕпе юманлăх та лартнă, вăл Çĕнтерÿ площадĕнче. Г.Н.Волков Чутая килсен çакăн пек сăмахсем каласа хăварнă: «…Чутай пĕтсен – чăваш пĕтет». Çак сăмахсене эпир яланах асра тытатпăр, хамăр тăрăхра чăвашлăха упрама тăрăшатпăр.

Библиотечные учреждения автономного учреждения "Многофункциональный культурный центр" Красночетайского района Чувашской Республики