00:00 03 мая 2007 г.
Красномайск шкулĕнче «Чăваш чĕлхи эрни» ирттересси йăлана кĕнĕ ĕнтĕ. Çак уява шкулсенче тĕрлĕрен ирттереççĕ. Малтанах ачасене программа валеçсе панă. Тĕрлĕрен интереслĕ вăйăсем ирттертĕмĕр. Кĕçĕн классем пулăшнипе курса ларакансем тĕрлĕрен юмахсене çитсе курчĕç. Уйрăммăн илсен пурне те группăна çÿрекенсен «Виçĕ сысна çури» юмахĕ килĕшрĕ. Выляма та пĕчĕк артистсем хăйсен ролĕсене питĕ ăста вылярĕç. Чи пултаруллисем - Зимина Диана, Сироткина Раиса. Аслисем те кая юлмарĕç. Куракансене 7 классен çĕнĕлле çырнă «Сармантейĕн сар чăххи» юмахĕ кăмăла кайрĕ.
Чăваш чĕлхипе литература эрнинче И.Я. Яковлева халалланă литмонтаж иртрĕ. Выляма 8 тата 9 класс ачисене явăçтарнă. Вĕсем тăрăшнипе пирĕн ума А.Рекеев, К.В.Иванов, Марфа Трубина, Федор Павлов тата чăваш улăпĕ- И.Я.Яковлев сăнарĕсем тухса тăраççĕ. Ачасем çак паллă çынсем халăх валли мĕн туни çинчен каласа пачĕç. Уйрамах Яковлев сăнарĕн, халалне каланă сăмахсем чĕре патне çитеççĕ. Курса ларакансем Яковлев рольне вылякан Алеша Леонтьев ăсталăхĕнчен тĕлĕнсе ларчĕç.
Уявсем вĕренекенсене тăван чĕлхене, литературăна, культурăна юратма, вĕсемпе кăсăкланма хавхалантараççĕ, тавра курăмне, пултарулăхне аталантарма май параççĕ.