09:53 20 мая 2013 г.
Чăваш Республикинчи çар комиссариачĕн Комсомольски тата Елчĕк районĕсенчи уйрăмĕнче тăрăшакансен халĕ хĕрÿ тапхăр — çуркуннехи çар призывĕ пырать. Вăл кăçал июлĕн 15-мĕшĕччен тăсăлĕ.
Акă, майăн 14-мĕшĕнче 9 призывник çар тумĕ тăхăнчĕ те, вĕсенчен 5-шĕ — Комсомольски районĕн территорийĕнче çуралса ÿснĕскерсем: Евгений Хамматов (Хирти Мăнтăр), Александр Кузьмин (Кивĕ Сĕнтĕр), Евгений Чебаков (Александровка), Раиль Шамсутдинов (Тутар Шурут) тата Зыльфинас Гибатдинов (Кайнлăк). Вĕсене ăсатма çар комиссариачĕн çурчĕ умне пулас салтаксен çывăх тăванĕсем, ял-йышĕ тата тус-юлташĕсем пухăнчĕç.
Ун хыççăн призывниксене пĕр класа пухса ЧР çар комиссариачĕн Комсомольски тата Елчĕк районĕсенчи уйрăмĕн начальникĕ Сергей Данилов инструктаж пачĕ. «Чăваш ятне çÿлте тытăр. Хĕсметре тăрса çĕр-шыва хÿтĕлесси — кашни ар çыннăн тивĕçĕ. Çавăнпа та ăна тÿрĕ кăмăлпа пурнăçламалла. Каялла пурте тĕрĕс-тĕкел таврăнăр!» —сунчĕ Сергей Юрьевич. Çавăн пекех кĕскен салтак пурнăçĕпе, паянхи çарти ĕç-хĕлпе паллаштарчĕ, ыйтусем çине хуравларĕ.
Çара каякансем умĕнче çар комиссариачĕн ĕçченĕ Юрий Венедиктов та сăмах каларĕ. «Кирек мĕнле лару-тăрăва лексен те ан манăр: сире килте кĕтеççĕ. Çавăнпа та çывăх çыннăрсем патне телефонпа шăнкăравлама ан ÿркенĕр. Шанатăп, эпир сирĕнпе мăнаçланăпăр, мухтанăпăр», — терĕ Юрий Владимирович.
Паян салтак атти тăхăннăскерсем пурте тип çĕр çинчи çара лекĕç. Сăмах май, вĕсенчен 6-шĕ Раççей ДОСААФĕн икĕ районти уйрăмĕсенче вĕренсе «В» тата «С» категориллĕ водитель специальноçне алла илнĕ. Сывлăх енчен çирĕп, пурте вăтам пĕлÿллĕ. Мĕнех, ăнăçу сунатпăр яшсене!
Комсомольский район Чувашской Республики