11:25 29 сентября 2018 г.
2018-мĕш çул – Иван Яковлевич Яковлев çулĕ. Вăл çуралнăранпа 170 çул çитрĕ. Çак пысăк уявпа çыхăнтарса Хирпуç ялĕн библиотекинче «И.Я.Яковлев – ачасене» ятлă кĕнеке кунĕ иртрĕ. Кĕçĕн çулхи ачасене И. Я. Яковлев çырнă калавсемпе паллаштартăмăр. И. Я. Яковлев калавĕсем паянхи шкул ачисемшĕн те пысăк пĕлтерĕшлĕ. Вĕсенче çамрăк ăрăва гуманизм тĕллевĕсене тĕпе хурса воспитани парас шухăш яр уççăн палăрать. Тĕслĕхрен, «Суеçĕ», «Кăлăх тавлашакансем» калавсем пĕр-пĕрне хисеплеме, çынра тĕрĕслĕхе аталантарма вĕрентеççĕ. «Чăлха çыхни», «Кахалпа юлхав» калавсенче вара ачасене ĕçе юратма, аслисене пулăшма хăнăхтарас тĕллев палăрать. «Çухалнă укçа тупăнни» калавра вăрă ĕçĕнчен пăрăнмалли, чыса ачаран упрамалли çинчен каланă. «Йăлăнтарни» калав та пысăк пĕлтерĕшлĕ. Вăл çыннăнне хапсăнмалла мар тесе вĕрентет, таса чунлă пулма хистет. И. Я. Яковлев калавĕсемпе паллашнă хыççăн ачасем пĕтĕмлетÿ тума пултарчĕç: хăшĕ лайăх, хăшĕ япăх, мĕн тĕрĕс, мĕн тĕрĕс мар.
Калаçу хыççăн ачасем килĕшнĕ кĕнекесене киле вулама илчĕç. Библиотекăна час-часах çӳреме кăмăл пурри çинчен каларĕç.
Хирпосинский территориальный отдел Вурнарского муниципального округа